‘આપ’નું એડ્ બજેટ મોદીનાં કપડાંના ખર્ચ કરતાં ઓછું : કેજરીવાલ

પણજીઃ દિલ્હીના મુખ્યમંત્રી અરવિંદ કેજરીવાલે ગુરુવારે આમ આદમી પાર્ટી(આપ)ની સરકારના ખર્ચ સામે પ્રશ્ન ઉઠાવનારાઓને જવાબ આપવાની સાથે જ વડાપ્રધાન નરેન્દ્ર મોદી પર વેધક પ્રહાર કર્યા હતા. કેજરીવાલે કહ્યું કે આપનું એડવર્ટાઈઝમેન્ટનું બજેટ મોદીના કપડાંના ખર્ચ કરતાં ઓછું છે. કેજરીવાલે દાવો કર્યો હતો કે મોદીએ ક્યારેય એક જ કપડાં બીજી વાર પહેર્યા નથી અને તેમના દરેક કપડાંની જોડીની કિંમત બે લાખ રૂપિયા છે.

ગોવાની બે દિવસની મુલાકાતે આવેલા આપના સંયોજક કેજરીવાલે ગુરુવારે અહીં સંપાદકો સાથેની એક મુલાકાતમાં કહ્યું હતું કે ‘એવું કહેવાય છે કે અમે(દિલ્હી સરકારે) ૫૨૬ કરોડ રૂપિયાની એડવર્ટાઈઝમેન્ટ આપી છે. આ સાવ ખોટું છે. અમે માત્ર ૭૬ કરોડ રૂપિયાની જ એડવર્ટાઈઝમેન્ટ આપી છે. દિલ્હી સરકારના તમામ વિભાગોનો એડ્નો ખર્ચ મોદીના કપડાંના કુલ ખર્ચ કરતાં પણ ઓછો છે.’ તેમણે મોદીના કપડાંની કિંમત વિશે કહ્યું કે ‘હું તમને હિસાબ આપી શકું છું. મોદીએ જે એક પોશાક પહેર્યો હતો તેની કિંમત બે લાખ રૂપિયા છે. તેઓ દિવસમાં પાંચ વાર કપડાં બદલે છે. તે દૃષ્ટિએ રોજના ૧૦ લાખ રૂપિયાનો ખર્ચ થાય છે. તે એક જ કપડાં બીજી વાર પહેરતા નથી, ધોવડાવતા નથી અને તેનો બીજી વાર પ્રયોગ પણ કરતા નથી.’