KBCમાં બિગ બીએ કરી હતી વિનંતી, પત્નીનું ટ્રાન્સફર થયું છતાં કન્ટેસ્ટન્ટ પતિ નારાજ!

KBCની હોટ સીટથી અમિતાભ બચ્ચનની એક અપીલ પર મંદસૌરના પોલીસચોકીમાં કાર્યરત કોન્સ્ટેબલ વિવેક પરમારની કોન્સ્ટેબલ પત્નીનું ટ્રાન્સફર કરવામાં આવ્યુ હતું. જોકે, તેમણે હવે સરકારી આદેશ પરત લેવાની માગણી કરી છે. વિવેકની સમસ્યાનું સમાધાન કરવા માટે પ્રદેશ સરકારની અપીલ કરનાર મંદસૌરના ધારાસભ્યે પણ આ બાબતને ખોટી ગણાવી છે. વિવેકનું કહેવું છે કે તેમણે પોતાનું ટ્રાન્સફર ગ્વાલિયર કરવાની વિનંતી કરી હતી પરંતુ સરકારે પત્નીનું ટ્રાન્સફર કરી દીધું. જેથી પારિવારિક મુશ્કેલીઓ વધી છે.

શું કહેવું છે વિવેકનું?
વિવેકનું કહેવું છે કે તેમના માતા-પિતા ગ્વાલિયરમાં રહે છે જ્યાં હાલ તેની પત્નીનું પોસ્ટિંગ હતું. પત્ની ત્યાં રહીને ઘરડા માતાપિતાની દેખભાળ કરી રહી હતી. તેઓ પોતે જ મંદસૌરમાં પોસ્ટેડ છે. જ્યાંથી ગ્વાલિયર ખૂબ જ દૂર છે. હવે પત્નીનું ટ્રાન્સફર થયા પછી તેના માટે સમસ્યા સર્જાય છે કે માતાપિતાનું ધ્યાન કેવી રીતે રાખવામાં આવે. વિવેકે કહ્યું છે કે તે પોતાનું ટ્રાન્સફર ગ્વાલિયર ઈચ્છતા હતાં. જેથી તે પત્ની સાથે રહી શકે અને પરિવારની દેખભાળ કરી શકે.

કૌન બનેગા કરોડપતિમાં આવ્યા હતા વિવેક
6 જાન્યુઆરીના રોજ પ્રસારિત કૌન બનેગા કરોડપતિના એપિસોડમાં વિવેક પરમાર હોટ સીટ પર પહોંચ્યા હતાં. વિવેકે 25 લાખ રુપિયાની રકમ જીતી હતી. આશરે 3 વર્ષ પહેલા વિવેકના લગ્ન પ્રીતિ સાથે થયા હતાં પરંતુ તે પછીથી જ પતિ-પત્ની અલગ અલગ જિલ્લાઓમાં કાર્યરત છે. વિવેક ગત 3 વર્ષથી પોતાનું ટ્રાન્સફર ગ્વાલિયર જિલ્લા આસપાસ કરવા ઈચ્છતો હતો.

અમિતાભ બચ્ચનને કરી હતી અપીલ
આ દરમિયાન તેમને કેબીસીમાં જવાની તક મળી અને શોના હોસ્ટ અમિતાભ બચ્ચને મધ્યપ્રદેશ સરકાર પતિ-પત્નીને એક જ જિલ્લામાં કાર્યરત થાય તેવી અપીલ કરી હતી. અમિતાભ બચ્ચનની અપીલ માનતા સરકારે તેની કોન્સ્ટેબલ પત્ની પ્રીતિનું ટ્રાન્સફર મંદસૌરના નાર્કોટિક્સ પોલીસ ચોકીમાં કર્યું છે. જોકે, તે પરત લેવાની માગણી કરી રહ્યાં છે.