Shocking: લિફ્ટ અને દરવાજા ફસાઈ જતા પાંચ વર્ષના બાળકનું મોત

મુંબઈ: મુંબઈના ધારાવી વિસ્તારમાં એક ચોંકાવનારી ઘટના સામે આવી છે. અહીં લિફ્ટમાં ફસાઈને એક પાંચ વર્ષના બાળકનું મોત થઈ ગયું. આ સમગ્ર ઘટના લિફ્ટમાં લાગેલા સીસીટીવીમાં કેદ થઈ ગઈ છે.

ઉલ્લેખનીય છે કે, મુંબઈના ધારાવી ચાર રસ્તા પર આવેલી પલવાડીમાં કોઝી શેલ્ટર બિલ્ડિંગની લિફ્ટમાં આ ઘટના બની છે. હકીકતમાં, ત્રણ ભાઈ-બહેન ગ્રાઉન્ડ ફ્લોરથી ચોથા માળે આવવા માટે ચઢ્યા. ત્રણે બાળકો રમતા-રમતા લિફ્ટમાં ચઢ્યા અને લિફ્ટનું બટન દબાવી દીધું. રવિવારે બપોરે લગભગ 1 કલાકે આ ઘટના બની.

થોડી જ વારમાં લિફ્ટ ગ્રાઉન્ડ ફ્લોરથી ચોથા માળે આવી ગઈ. લિફ્ટના કેમેરામાં જોવા મળી રહ્યું છે કે, પહેલા બે બહેનો બહાર નીકળી અને તે પછી પાંચ વર્ષનો હુજૈફા સરફરાઝ શેખ બહાર નીકળવા જાય છે. પરંતુ હુજૈફા બહાર નીકળે તે પહેલા બહારનો લાકડાનો દરવાજો બંધ થઈ જાય છે અને હુજૈફા લિફ્ટના દરવાજા અને બહારના લાકડાના દરવાજા વચ્ચેની જગ્યાઓમાં ફસાઈ જાય છે. એ જ સમયે લિફ્ટ ચાલુ થઈ ગઈ.

લિફ્ટ ચાલુ થઈ જતા હુજૈફા પણ લિફ્ટની સાથે નીચે જતો રહે છે અને તેનું ઘટનાસ્થળે જ મોત થઈ જાય છે. હુજૈફાના મૃતદેહને ફાયર બ્રિગેડની મદદથી બહાર કાઢવામાં આવ્યો. ઘટના અંગે પોલીસે કેસ નોંધી તપાસ હાથ ધરી છે.

સીસીટીવી ફૂટેજમાં જોવા મળી રહ્યું છે કે, છઠ્ઠા માળનું બટન રેડ જોવા મળી રહ્યું છે, જે દર્શાવે છે કે, કોઈએ છઠ્ઠા માળે લિફ્ટ બોલાવી હતી.

ઉલ્લેખનીય છે કે, લિફ્ટમાં બાળક ફસાઈ જવાથી મોતની આ પહેલી ઘટના નથી. આવા ઘણા અકસ્માતો ભૂતકાળમાં સામે આવ્યા છે. બે વર્ષ પહેલા સુરતમાં ધોરણ 4નો વિદ્યાર્થીનું લિફ્ટમાં ફસાઈ જવાથી મોત થયું હતું. ગત વર્ષે પણ અમદાવાદના આનંદનગર વિસ્તારમાં પ્લેટિનિયમ હોટલમાં 12 વર્ષનો એક બાળકનું લિફ્ટમાં ફસાઈ જતા મોત થયું હતું. જોકે, આવી ઘટનાઓમાં ભાગ્યે જ કોઈ જવાબદાર સામે કાર્યવાહી થતી હોય છે. ઘણી બિલ્ડિંગોમાં લિફ્ટ સબસ્ટાન્ડર્ડ જ નાખીને આપવામાં આવતી હોવા છતાં તંત્ર આંખ આડા કાન કરી મંજૂરી આપી દેતું હોય છે. લિફ્ટને લઈને ઘણા નિયમો બનાવાયા હોવા છતાં દેશમાં ક્યાંય તેનું પાલન થતું નથી. ઘણા કિસ્સામાં સોસાયટીઓની પણ બેરદકારી આ બાબતે સામે આવી છે. જોકે, દર વખતે કોઈ ઘટના બને ત્યારે થોડો હોબાળો થાય છે પછી પાછું બધું જેમનું તેમ જ ચાલવા લાગે છે.