ડિવૉર્સ બાદ અલગ થયા દંપતી, 2 કુતરાની કસ્ટડીનો હક વહેંચ્યો

મુંબઈ: તમે એવા ઘણા કિસ્સા જોયા હશે જેમાં ડિવૉર્સ બાદ દંપતી વચ્ચે તેમની કસ્ટડી માટે કેસ ચાલતા હોય પણ મુંબઈમાં એક કપલે પરસ્પર સહમતિથી ડિવૉર્સ લીધા અને અલગ થવાનો નિર્ણય લીધા બાદ તેમની વચ્ચે તેમના પાળતુ કૂતરાની કસ્ટડી માટે વહેંચણી થઈ.

દંપતીના લગ્ન 18 વર્ષ પહેલા થયા હતા. બંનેને કોઈ સંતાન નથી. પત્ની હાઉસવાઈફ છે અને પતિ એક બેન્કર છે. ત્રણ વર્ષ પહેલા બંનેએ એક મહિનાના બે ઈન્ડી પિલ્લોને દત્તક લીધા હતા. દંપતી આ ડૉગીની જોડીને અલગ કરવા માગતું નથી. બંનેએ મળીને આ બંને કૂતરાની ન માત્ર કસ્ટડી વહેંચી પરંતુ તેના માટે વિસ્તૃત યોજના પણ બનાવી.

લગ્નના 18 વર્ષ બાદ લીધા છૂટાછેડા

દંપતીએ કોવિડ-19 લૉકડાઉનની પહેલા પરસ્પર સહમતિથી ડિવૉર્સ માટે અરજી આપી હતી. 40ની ઉંમર પાર કરી ચૂકેલા આ દંપતીનું કહેવું હતું કે, તેમની આદતો, વિચારો અને લાઈફસ્ટાઈલ એકબીજા સાથે મેળ ખાતા નથી. બંને વચ્ચે મતભેદ વધી ગયા હતા અને બંને અલગ રહેવા માગતા હતા. બંનેની વચ્ચે કૂતરાની કસ્ટડી માટે પણ વહેંચણી થઈ.

આ રીતે થશે વહેંચણી

બેન્કરને પ્રાઈમરી કસ્ટડી મળશે, બીજી તરફ વર્ષમાં ત્રણ વાર (દર વખતે એક મહિના) હોમમેકરને તેનો અધિકાર મળશે. જેની પાસે કસ્ટડી હોય તેને કોઈ કામથી લાંબા સમય માટે બહાર જવાનું થાય તો તે 15 દિવસ પહેલા બીજાને આની જાણકારી આપી દેશે.

દંપતી ડિસેમ્બર 2018માં જ અલગ થઈ ગયું હતું. સ્વતંત્રતા દિવસ પર બંનેની કોર્ટમાં છેલ્લી તારીખ હતી. આ તેમની છેલ્લી કાઉન્સિલિંગનો દિવસ હતો. બંનેના સહમતિથી ડિવૉર્સ થઈ ગયા. આ કેસ પર સુનવણી દરમિયાન બંનેએ વર્ચ્યુઅલ કોર્ટના જજ સાથે વાત કરી.