મુંબઈમાં પડી રહેલા મૂશળધાર વરસાદને કારણે જનજીવન પ્રભાવિત થયું છે. સોમવારે મોડી રાતે વરસાદ થોડી વાર માટે રોકાયો હતો અને મંગળવારે સવારથી ફરીથી શરુ થઈ ગયો છે. હવામાન વિભાગે આગામી 2-3 સુધી ભારે વરસાદની આગાહી કરી છે. રાહત અને બચાવ કાર્યો માટે નેવીના હેલિકોપ્ટર તૈયાર રાખવામાં આવ્યા છે. NDRFને પણ હાઈ એલર્ટ પર રાખવામાં આવી છે. 2005માં મુંબઈમાં આવેલા ભયાનક પૂરનું પુનરાવર્તન ન થાય તેવી લોકો પ્રાર્થના કરી રહ્યા છે. સતત પડી રહેલા વરસાદને કારણે લોકલ ટ્રેન, રોડ અને હવાઈ સેવા પણ પ્રભાવિત થઈ છે. અનેક સ્થળોએ વરસાદને કારણે ઝાડ પડવાની ઘટના બની છે જેના કારણે લોકો કલાકો સુધી રસ્તામાં ફસાઈ રહ્યા. આજે પણ BMC દ્વારા તમામ શાળા-કોલેજો બંધ રાખવાનો આદેશ આપવામાં આવ્યો છે. લોકોને પણ કામ વિના બહાર નહીં જવાની સૂચના આપવામાં આવી રહી છે. જો લોકલ ટ્રેનની વાત કરવામાં આવે તો અમુક રુટ્સ સામાન્ય રીતે ચાલુ છે જ્યારે અમુક રુટ્સ પાણી ભરાઈ જવાને કારણે બંધ છે. રેલવે પોતાના ટ્વિટર અકાઉન્ટ પર સતત રુટ્સ વિષે અપડેટ આપતી રહે છે. તાજેતરમાં હવામાન વિભાગના DDGએ માહિતી આપી છે કે, મુંબઈમાં અમુક કલાકો સુધી વરસાદ નહીં પડે કારણકે વાદળ ઉત્તર તરફ જતા રહ્યા છે. દક્ષિણ ગુજરાત અને અન્ય વિસ્તારોમાં વરસાદની આગાહી કરવામાં આવી છે. આ સિવાય મુંબઈ સહિત ઉત્તર કોંકણ વિસ્તારમાં સામાન્ય વરસાદની આશંકા છે.
મુંબઈ: વધુ 2 દિવસ ભારે વરસાદની આગાહી, નેવી-NDRF એલર્ટ પર
I am Gujarat 30 Aug 2017, 9:43 am