મુંબઈથી આવ્યા ગુડ ન્યૂઝ, 3 મહિના પછી 1 દિવસમાં નોંધાયા સૌથી ઓછા કોરોના કેસ

મુંબઈ : ભયનો સમાનાર્થી બની ચૂકેલા કોરોના વાયરસના સંક્રમણની વચ્ચે મુંબઈથી એક રાહતના સમાચાર આવ્યા છે. અહીં સોમવારે કોરોના સંક્રમણના 700 નવા કેસ મળ્યા જે છેલ્લા 100 દિવસોમાં સૌથી ઓછો આંકડો છે. અહીં 8776 ટેસ્ટ કરવામાં આવ્યા જે પણ એક રેકોર્ડ છે.

મુંબઈમાં ટેસ્ટિંગની ક્ષમતા વધારવાથી કોરોના પૉઝિટિવિટી રેટમાં ઘટાડો નોંધાયો છે. BMC સ્વાસ્થ્ય વિભાગના આંકડા અનુસાર, અત્યારે મુંબઈમાં કોરોનાનો પૉઝિટિવિટી રેટ 20 ટકાની નીચે છે એટલે કે દર 100 સેમ્પલની તપાસ કરતા તેમાંથી 20થી ઓછા લોકો પૉઝિટિવ મળી રહ્યા છે. મે મહિનામાં આ રેટ 40 ટકા હતો જ્યારે 22 મેના રોજ તે 50 ટકાને પણ પાર કરી ગયો હતો.

15 ટકાએ આવી ગયો પૉઝિટિવિટી રેટ

બીમારી પૉઝિટિવિટી રેટમાં ઘટાડો નોંધાવાની સાથ જ ડબલિંગ રેટ વધીને 67 દિવસ થઈ ગયો છે. છેલ્લા એક સપ્તાહમાં વાયરસનો ગ્રોથ પણ ઘટીને 1.03 ટકા પર આવી ગયો છે. છેલ્લા પાંચ દિવસમાં કેસના આંકલનથી જાણવા મળે છે કે, 21થી 25 જુલાઈ સુધી મુંબઈમાં 35,742 ટેસ્ટ કરવામાં આવ્યા. આ દરમિયાન 5273 લોકો પોઝિટિવ નોંધાયા. આ સરેરાશ 15 ટકા પૉઝિટિવિટી રેટ છે.

અત્યારે ખૂબ જ સતર્કતા રાખવાની જરૂર

નિષ્ણાતોએ જણાવ્યું કે, ગ્રોથ રેટમાં ઘટાડા અને રિકવરી રેટમાં વધારાની સાથે જો પૉઝિટિવિટી રેટમાં ઘટાડો આવે છે તો તેને સકારાત્મક સંકેત માની શકાય છે. જોકે, લોકોએ અત્યારે બહુ સતર્કતા વર્તવાની જરૂર છે. BMC સ્વાસ્થ્ય વિભાગના એડિશનલ મ્યુનિસિપલ કમિશ્નર સુરેશ કાકાણીએ જણાવ્યું કે, 'મહાનગરમાં ટેસ્ટિંગ વધારવા માટે અમે ટેસ્ટિંગ પૉલિસીમાં ફેરફાર કરતા દરેકને ડૉક્ટરી સલાહ વિના તપાસ કરાવવાની પરવાનગી આપી દીધી છે.'

આ ઉપરાંત રાજ્યમાં છેલ્લા 24 કલાકમાં 227 લોકોના કોરોનાને કારણે મોત થયા છે. મહારાષ્ટ્રમાં કોરોના સંક્રમણથી મૃત્યુ પામનારાઓની સંખ્યા વધીને 13883 થઈ ગઈ છે. રાજ્યમાં કોરોના સંક્રમણના અત્યાર સુધી 383,723 કેસ સામે આવ્યા છે. આમાંથી કુલ એક્ટિવ કેસ 147592 છે.