જ્હાન્વી કુકરેજા મર્ડર કેસ: મિત્રોના 'દબાણ'થી યુવતી પહેલી વખત પાર્ટીમાં ગઈ હતી

મુંબઈ: 19 વર્ષીય જ્હાન્વી કુકરેજા નામની યુવતીનો મૃતદેહ મુંબઈના ખાર વિસ્તારમાં આવેલી ભગવતી હાઈટ્સના ગ્રાઉન્ડ ફ્લોર પરથી મળી આવ્યો હતો. જ્યાં જ્હાન્વી કુકરેજા તેના બે અન્ય મિત્રો શ્રી જોગડાનકર અને દિયા પાડલકરની સાથે નવા વર્ષની પાર્ટી માટે ગઈ હતી. મૃતક જ્હાન્વી કુકરેજાના આ બંને મિત્રોની હાલ ધરપકડ કરવામાં આવી છે. પોલીસે આ કેસમાં વધુ તપાસ હાથધરી છે.

મળતી માહિતી મુજબ, જ્હાન્વી કુકરેજાએ રાત્રે લગભગ દોઢ વાગ્યાની આસપાસ તેના એક મિત્રને ફોન કરીને એ પ્રકારે ડર વ્યક્ત કર્યો હતો કે પાડલકરે તેની સાથે કશું કરવાનો પ્લાન ઘડ્યો છે. ન્યૂયરની પાર્ટી દરમિયાન જ્હાન્વી કુકરેજાએ શ્રી અને દીયાને એકબીજાની ખૂબ નજીકની સ્થિતિમાં જોઈ લીધા હતા. આ જોતા જ જ્હાન્વી કુકરેજા રડવા લાગી હતી. પોલીસે જણાવ્યું કે જ્હાન્વી કુકરેજાની હત્યા બાદ તપાસ કરતા તેના મિત્ર શ્રી જોગડાનકરના શરીર પર ઈજાના નિશાન જોવા મળતા હાલ તે દિશામાં તપાસ કરવામાં આવી રહી છે.

જ્હાન્વી કુકરેજાની માતાએ વધુ વાત કરતા જણાવ્યું કે મારી દીકરી જ્હાન્વી અને દિયા વચ્ચે 13 વર્ષથી મિત્રતા હતી. સામાન્યરીતે મારી દીકરી જ્હાન્વી કોઈ પાર્ટીમાં જતી નહોતી અને તેણે આગામી વર્ષે ઓસ્ટ્રેલિયા ભણવા જવા માટેનું આયોજન કર્યું હતું, જેના પર તે પૂરું ધ્યાન કેન્દ્રિત કરી રહી હતી. પણ, જ્હાન્વી કુકરેજાના મિત્રો દિયા અને શ્રીએ વિનંતી કરતા તેમની સાથે તે નવા વર્ષની પાર્ટીમાં ગઈ હતી.

પોલીસે જ્હાન્વી કુકરેજા હત્યા કેસમાં વધુ વાત કરતા જણાવ્યું કે અમે બે શક્યતા પર તપાસ કરી રહ્યા છીએ કે જ્હાન્વી કુકરેજાને બીજા માળથી ખેંચીને સીડી પરથી ગ્રાઉન્ડ ફ્લોર પર લાવવામાં આવી હતી અથવા તો તેને ધક્કો મારવામાં આવ્યો હતો. કારણકે, લોહીના ડાઘા અને વાળના ગુચ્છા સીડીઓ પરથી મળી આવ્યા છે. આ પાર્ટીમાં અન્ય જે લોકો હાજર હતા તેઓની પણ પૂછપરછ કરવામાં આવી રહી છે.