'સ્કિન-ટુ-સ્કિન ટચ' અંગે બોમ્બે હાઈકોર્ટે આપેલા જજમેન્ટ પર સુપ્રીમની રોક

નવી દિલ્હી: અવયસ્ક છોકરીના વક્ષસ્થળને સ્કિન ટુ સ્કિન ટચ વિના સ્પર્શ કરવાને પોક્સો હેઠળ ગુનો ના કહી શકાય તેવા બોમ્બે હાઈકોર્ટના નિર્ણ પર સુપ્રીમ કોર્ટે સ્ટે આપ્યો છે. યુથ બાર એસોસિયએશન દ્વારા બોમ્બે હાઈકોર્ટના આ ફેસલા વિરુદ્ધ સુપ્રીમમાં પિટિશન કરવામાં આવી હતી. નાગરિક સંગઠનો ઉપરાંત, અનેક જાણીતા લોકોએ પણ આ ફેસલાને હાસ્યાસ્પદ ગણાવી તેની આલોચના કરી હતી.

બોમ્બે હાઈકોર્ટની નાગપુર બેન્ચે 12 વર્ષની એક છોકરી સાથે થયેલા આ કૃત્ય અંગે નોંધાયેલા ગુનાની સુનાવણીમાં જણાવ્યું હતું કે કોઈ બાળકીને નિર્વસ્ત્ર કર્યા વિના તેના તેના વક્ષસ્થળને સ્પર્શ કરવો તે જાતિય હુમલો કહી શકાય નહીં. કોર્ટે પોતાના નિર્ણયમાં જણાવ્યું હતું કે આ પ્રકારની હરકત પોક્સો એક્ટ હેઠળ જાતિય હુમલામાં પરિભાષિત કરી ના શકાય. જોકે, આરોપી વિરુદ્ધ કલમ 354 હેઠળ કેસ ચલાવવો જોઈએ.

આ કેસની વિગત એવી છે કે, ફેબ્રુઆરી 2020માં નાગપુરના 39 વર્ષના એક શખ્સ વિરુદ્ધ એક અવયસ્ક છોકરીના સ્તન દબાવવા બદલ ગુનો દાખલ કરવામાં આવ્યો હતો. નાગપુરની ટ્રાયલ કોર્ટે આરોપીને પોક્સોના સેક્શન 8 તેમજ આઈપીસીની કલમ 354 હેઠળ આ શખ્સને ત્રણ વર્ષની સજા ફટકારી હતી. નીચલી કોર્ટના ચુકાદાને આરોપીએ હાઈકોર્ટમાં પડકાર્યો હતો, અને બોમ્બે હાઈકોર્ટની નાગપુર બેન્ચે આ વ્યક્તિને આ આરોપમાંથી મુક્ત કરતા જણાવ્યું હતું કે સ્કિન ટુ સ્કિન ટચ ના થયો હોવાના કારણે આરોપી વિરુદ્ધ નોંધાયેલો ગુનો પોક્સો એક્ટ હેઠળ જાતિય હુમલાની વ્યાખ્યામાં આવતો નથી.

બોમ્બે હાઈકોર્ટની નાગપુર બેન્ચના જસ્ટિસ પુષ્પા ગનેડીવાલાએ 19 જાન્યુઆરીએ આપેલા ચુકાદામાં જણાવ્યું હતું કે કોઈ હરકતને જાતિય હુમલો માનવા માટે 'મેલા ઈરાદા સાથે ત્વચાથી ત્વચાનો સંપર્ક થવો જરુરી છે.' તેમણે પોતાના જજમેન્ટમાં એમ પણ કહ્યું હતું કે માત્ર સ્પર્શ કરવાને જાતીય હુમલાની પરિભાષામાં ના મૂકી શકાય. કોર્ટે આરોપીએ કરેલા કૃત્યને સામાન્ય ગુનો ગણાવીને નીચલી કોર્ટે ફટકારેલી ત્રણ વર્ષની સજાને ઘટાડીને એક વર્ષ કરી હતી. હાલ આરોપી જામીન પર છે, અને કોર્ટે તેની વિરુદ્ધ બિનજામીનપાત્ર વોરન્ટ જાહેર કર્યું છે.

પીડિતાએ પણ કોર્ટ સમક્ષ આ મામલે પોતાની ગવાહી આપી હતી. જેમાં તેણે જણાવ્યું હતું કે આરોપી તેને લાલચ આપીને પોતાના ઘરમાં લઈ ગયો હતો, અને ત્યાં તેણે તેનું સલવાર ઉતારવા પ્રયાસ કરી વક્ષસ્થળ પર હાથ ફેરવ્યો હતો. છોકરીએ તે વખતે બૂમાબૂમ કરવા પ્રયાસ કર્યો હતો, પરંતુ આરોપીએ તેનું મોઢું દબાવી દીધું હતું, અને ત્યારબાદ ઘરનો દરવાજો બહારથી બંધ કરીને જતો રહ્યો હતો.

બીજી તરફ, છોકરીને શોધવા નીકળેલી તેની મમ્મી બિલ્ડિંગના પહેલા માળે આવી હતી. તેણે આરોપીને બહાર જતા પણ જોયો હતો. આરોપીના ઘરનું બારણું બહારથી બંધ હતું અને અંદર છોકરી રડી રહી હતી. છોકરીની મમ્મીએ તેને બહાર કાઢી હતી, અને ત્યારબાદ તેણે પોલીસ સ્ટેશન પહોંચીને ફરિયાદ નોંધાવી હતી.