વડાપ્રધાન મોદીએ તોડી નાંખ્યો અટલ બિહારી વાજપાઈનો આ રેકોર્ડ

2014ની લોકસભા ચૂંટણીમાં નરેન્દ્ર મોદીની આગેવાનીમાં ભાજપે ઐતિહાસિક વિજય મેળવ્યો હતો. તેમણે 26 મેચ 2014ના રોજ વડાપ્રધાન તરીકે શપથ લીધા હતા. બાદમાં 2019ની લોકસભાની ચૂંટણીમાં પણ ભાજપે ઐતિહાસિક જીત મેળવી હતી અને નરેન્દ્ર મોદી ફરીથી વડાપ્રધાન બન્યા હતા. હવે તેઓ ભારતના ઈતિહાસમાં ચોથા સૌથી લાંબા સમય સુધી સેવા આપનારા વડાપ્રધાન બની ગયા છે.

વાજપાઈ ત્રણ વખત વડાપ્રધાન બન્યા હતા. પ્રથમ વખત તેઓ 1996મા વડાપ્રધાન બન્યા હતા પરંતુ બહુમતી સાબિત કરી શક્યા ન હતા. ત્યારબાદ તેઓ 1998 અને 1999મા વડાપ્રધાન બન્યા હતા અને 2004 સુધી સત્તામાં રહ્યા હતા. વાજપાઈ પ્રથમ એવા બિનકોંગ્રેસી વડાપ્રધાન હતા જેઓ પોતાનો કાર્યકાળ પૂરો કરી શક્યા હતા.

સૌથી લાંબો સમય સુધી વડાપ્રધાન પદ પર રહેવાનો રેકોર્ડ દેશના પ્રથમ વડાપ્રધાન જવાહરલાલ નેહરૂના નામે છે. તેઓ 16 વર્ષ અને 286 દિવસ સુધી વડાપ્રધાન પદ પર રહ્યા હતા. બીજા નંબર પર તેમના પુત્રી ઈંદિરા ગાંધી છે જેઓ 15 વર્ષ 350 દિવસ સુધી વડાપ્રધાન રહ્યા હતા.

નેહરુ અને ઈંદિરા ગાંધી બાદ સૌથી લાંબો સમય સુધી વડાપ્રધાન પદ પર રહેવાનો રેકોર્ડ મનમોહન સિંહના નામે છે. મનમોહન સિંહ 10 વર્ષ અને ચાર દિવસ સુધી વડાપ્રધાન રહ્યા હતા. તેઓ 22 મે 2004થી 26 મે 2014 સુધી વડાપ્રધાન રહ્યા હતા.

સૌથી ઓછા સમય સુધી વડાપ્રધાન પદ પર રહેવાનો રેકોર્ડ ગુલજારી લાલ નંદાના નામે છે. લાલ બહાદુર શાસ્ત્રીના નિધન બાદ તેઓ 11 જાન્યુઆરી 1966થી 24 જાન્યુઆરી 1966 એટલે કે 13 દિવસ માટે કાર્યકારી વડાપ્રધાન રહ્યા હતા. અગાઉ જવાહર લાલ નેહરુના નિધન બાદ પણ તેઓ 27 મે 1964થી 9 જૂન 1964 સુધી કાર્યકારી વડાપ્રધાન રહ્યા હતા.