રક્ષાબંધન પર બહેનને વીરપસલી: નક્સલી ભાઈએ કર્યું આત્મસમર્પણ, માથે હતું 8 લાખનું ઈનામ

દંતેવાડા : છત્તીસગઢના નક્સલ પ્રભાવિત જિલ્લા દંતેવાડામાં 8 લાખના ઈનામી નક્સલીએ રક્ષાબંધન પર બહેનની અપીલ બાદ સરેન્ડર કરી દીધું. બહેને રક્ષાબંધન પર ભાઈને જંગલ પાછા ન જવાની અપીલ કરી હતી, જ્યારબાદ તેણે આત્મસમર્પણ કરી દીધું. 8 લાખના ઈનામી નક્સલી મલ્લા 12 વર્ષની ઉંમરે ઘરેથી ભાગી ગયો હતો અને નક્સલ આંદોલનમાં જોડાઈ ગયો હતો. તે 14 વર્ષ બાદ પોતાના ઘરે પરત ફર્યો. મલ્લા દંતેવાડાના પલનર ગામનો રહેવાસી છે.

નક્સલી મલ્લાએ ઘણા વર્ષથી પોતાની બહેનને જોઈ નહોતી, એટલે આ વખતે તે તેને મળવા ઘરે આવ્યો હતો. જોકે, બહેને તેને પરત જવાની ના પાડી દીધી અને પોલીસ સામે સરેન્ડરની અપીલ કરી હતી. કથિતપણે તેના ભાઈના જીવનો ખતરો હતો. છેલ્લા કેટલાક સમયમાં સુરક્ષાદળો દ્વારા આ વિસ્તારમાં ઘણા નક્સલીઓને ઠાર કરવામાં આવ્યા છે.

મલ્લાને તેની અગાઉની જિંદગી વિશે પૂછવામાં આવતા તેણે કહ્યું કે, 'હું 2016થી પ્લાટૂન કમાન્ડર હતો.' તે જે પ્લાટૂનનું નેતૃત્વ કરી રહ્યો હતો તે એક નક્સલ કેડર 'ભેરમગઢ એરિયા કમિટી'માં સ્થિત છે. દંતેવાડાના પોલીસ અધીક્ષક અભિષેક પલ્લવે ANIને જણાવ્યું કે, 'તે પ્લાટૂન કમાન્ડર હોવાને કારણે તમામ મોટી ઘટનાઓમાં શામેલ હતો. આ ઘટનામાં ઘણા પોલીસકર્મીઓના જીવ ગયા છે. તેણે દંતેવાડા જિલ્લાના 'લોન વર્રાટૂ અભિયાન' અંતર્ગત સરેન્ડર કર્યું છે.'

દંતેવાડા પોલીસ દ્વારા નક્સલીઓને પાછા મેઈન સ્ટ્રીમમાં લાવવા માટે અભિયાન ચલાવવામાં આવી રહ્યું છે. આ સ્કીમ અંતર્ગત, નક્સલીઓના આત્મ સમર્પણ પર તેમને પસંદગીનો રોજગાર આપવાનો વાયદો કરવામાં આવી રહ્યો છે.