ચિંતાનું કારણઃ દેશમાં સતત ત્રીજા દિવસે 16.5 હજારથી વધુ નવા કોરોના કેસ નોંધાયા
દેશમાં કોરોના ફરી ઝડપ પકડી રહ્યો છે. સતત ત્રીજા દિવસે 16000થી વધુ કેસ સાથે રાઉન્ડ-ટુની આશંકા પ્રબળ બનતી જઈ રહી છે.
TNN 27 Feb 2021, 8:23 am
હાઈલાઈટ્સ:
- દેશમાં હવે મહારાષ્ટ્ર સિવાય અન્ય રાજ્યોમાં પણ કોરોના કેસ સતત વધી રહ્યા છે.
- કોરોના રાઉન્ડ ટુ શરું થવાની આશંકા વધુ પ્રબળ બનતી જઈ રહી છે.
- બીજી તરફ દેશમાં 1 માર્ચથી રસીકરણને વધુ વ્યાપક બનાવવા માટે વોક ઈન રસી લેવા માટેની મંજૂરી આપવામાં આવી છે.
નવી દિલ્હીઃ દેશમાં છેલ્લા કેટલાક દિવસથી કોરોના કેસમાં વધારો જોવા મળી રહ્યો છે. તેવામાં નિષ્ણાંતોએ પણ ચિંતા વ્યક્ત કરતાં કહ્યું છે કે આ કોરોના મહામારીનો ભારતમાં બીજો રાઉન્ડ હોઈ શકે છે. દુનિયાના જુદા જુદા દેશોની ઘટના પરથી આપણે બોધપાઠ લઈ શકીએ છીએ કે કોરોનાના દરેક આવાનર રાઉન્ડ તેના પહેલાના રાઉન્ડ કરતા વધુ ઘાતક અને વ્યાપક રહ્યા છે. પછી તે અમેરિકા હોય કે ઇટલી કે પછી યુકે અને સ્પેન દરેક જગ્યાએ કોરોનાએ બીજા રાઉન્ડમાં અને ઉત્તરોત્તર વધુ વિનાશ વેર્યો છે. ત્યારે કોરોના કેસમાં આશ્ચર્યજનક ઘટાડા આવ્યા પછી ગઈકાલનો શુક્રવાર સતત ત્રીજો દિવસ છે જ્યારે દેશમા એક જ દિવસમાં 16.5 હજાર કરતા વધુ નવા કેસ નોંધાયા હોય. તેમજ એક જ દિવસમાં 114 જેટલા લોકો કોરોનાના કારણે મોતના મુખમાં નખાયા છે.
મહત્વનું છે કે શુક્રવારે મહારાષ્ટ્રમાં થોડા ઓછા કેસ નોંધાયા છતા દેશમાં એક દિવસમાં નવા કોરોના કેસનો આંકડો જેમનો તેમ જ રહ્યો છે કારણ કે મહારાષ્ટ્રમાં કેસ ભલે ઓછા નોંધાયા પણ બીજા રાજ્યોમાં પણ હવે નવા કોરોના કેસમાં વધારો જોવા મળી રહ્યો છે. જેમ કે પંજાબમાં નવા કોરોના કેસમાં સતત વધારો દેખાઈ રહ્યો છે. શુક્રવારના દિવસે પંજાબમાં 628 નવા કોરોના કેસ નોંધાયા હતા જે પાછલા 78 દિવસમાં સૌથી વધુ છે. તો છેલ્લા 75 દિવસમાં પહેલીવાર દૈનિક આંકડો 600ને પાર થયો છે. તેવી જ રીતે દક્ષિણ ભારતના અન્ય રાજ્ય કર્ણાટકમાં પણ સતત કેસ વધી રહ્યા છે. અહીં શુક્રવારે 571 નવા કોરોના કેસ સામે આવ્યા હતા. જે 24 જાન્યુઆરી પછી સૌથી વધુ છે. જેમાં પણ સૌથી વધુ કેસ બેંગલુરુના શહેરી વિસ્તારમાં સામે આવ્યા છે જ્યાં 368 કેસ નોંધાયા છે.
આ ઉપરાંત ગુજરાતમાં પણ સતત કોરોના કેસ વધી રહ્યા છે. અહીં શુક્રવારે 460 નવા કોરોના કેસ નોંધાયા છે. નવા નોંધાયેલા કેસમાં અમદાવાદમાં 101, સુરતમાં 74, વડોદરામાં 109, રાજકોટમાં 67, ભાવનગરમાં 13, ગાંધીનગરમાં 10, કચ્છમાં 9, છોટા ઉદેપુર, ખેડા, મહીસાગર, પંચમહાલમાં 6-6 સહિત કુલ 460 કેસ નોંધાયા છે. જ્યારે વિધાનસભાની ચૂંટણી આવી રહી છે તેવા રાજ્ય તામિલનાડુમાં પણ કોરોના કેસ સતત વધી રહ્યા છે. રાજ્યમાં શુક્રવારે 481 નવા કોરોના કેસ નોંધાયા હતા.