કોહિનૂર ભારતને પાછો આપવાનું કોઈ કાયદા ધોરણ નથીઃ બ્રિટનના પ્રધાન

નવી દિલ્હી: બ્રિટન પાસેથી કોહિનૂર પાછો લાવવાની ભારતની ઝુંબેશને ફટકો પડ્યો છે. બ્રિટનના એશિયા અને પેસિફિક બાબતોના પ્રધાન આલોક શર્માએ બુધવારે કહ્યું હતું કે, કોહિનૂર પાછો આપવાના કોઈ કાયદા ધોરણ ન હોવાનું તેમની સરકારે કહ્યું છે. બ્રેક્ઝિટ બાદ ભારત આવનારા તે પહેલાં બ્રિટિશ મિનિસ્ટર છે. આલોક શર્માએ કહ્યું છે કે, ‘કોહિનૂર પાછો મોકલવાનું કોઈ લીગલ ગ્રાઉન્ડ છે તેવું બ્રિટિશ સરકારે ક્યારેય માન્યું નથી.’

ગયા મહિને એવા સમાચાર વહેતા થયા હતા કે, ભારત વિશ્વના સૌથી કીમતી હીરામાંથી એક કોહિનૂર પાછો લાવવા માટે ટૂંક સમયમાં જ બ્રિટન સાથે વાતચીત કરશે. હાલ તો કોહિનૂર ટાવર ઓફ લંડનમાં પ્રદર્શિત રાજમુકુટમાં લગાવેલો છે. સૂત્રોના જણાવ્યાનુસાર, એક ઉચ્ચ સ્તરીય બેઠકમાં આ નિર્ણય લેવાયો છે.

1849માં ઇસ્ટ ઇન્ડિયા કંપનીની સેનાએ પંજાબની હાર બાદ શીખ સામ્રાજ્ય પાસેથી કોહિનૂર કાઢી કંપનીની તિજોરીમાં પહોંચાડી દીધો હતો. એ સમયે ઇસ્ટ ઇન્ડિયા કંપનીનો કોષ લાહોરમાં હતો. બાદમાં કોહિનૂર હીરાને બ્રિટનનાં મહારાણી વિક્ટોરિયાને સુપરત કરાયો હતો. જોકે હવે ભારત ઘણા સમયથી કોહિનૂર પાછો લાવવાના પ્રયાસ કરી રહ્યું છે. બ્રિટને 2013માં આ માગનો અસ્વીકાર કર્યો હતો.