ભારતના વિરોધ વચ્ચે ગિલગિટ-બાલ્ટિસ્તાનમાં ઈમરાન ખાને યોજી ચૂંટણી, હવે ફસાયા

પાકિસ્તાન પીપલ્સ પાર્ટી (પીપીપી)ના ગિલગિટ-બાલ્ટિસ્તાનના પ્રવક્તા શાહઝાદ ઈલ્હામીએ આરોપ લગાવ્યો છે કે ઈમરાન સરકારે આ વિસ્તારને દેશનું પાંચમું રાજ્ય બનાવવા ફક્ત ચૂંટણીનું વચન આપ્યું હતું. તેમણે કહ્યું હતું કે, ઈમરાન ખાનની પાર્ટી પાસે દેશની સંસદમાં બહુમતી નથી. તેવામાં તેઓ બંધારણીય સુધારાને મંજૂરી અપાવી શકે નહીં. ઈમરાન ખાનનું આ વચન ફક્ત ચૂંટણીનો સ્ટંટ જ હતો.

2009મા ગિલગિટ-બાલ્ટિસ્તાનની વિધાનસભા સ્થાપિત થયા બાદ પ્રથમ વખત એવું થયું છે કે જ્યારે ઈસ્લામાબાદમાં સત્તા પર રહેલી પાર્ટી ક્ષેત્ર ચૂંટણીમાં સ્પષ્ટ બહુમતી હાંસલ કરવામાં નિષ્ફળ રહી છે. મંગળવારે સત્તાવાર પરિણામો પ્રમાણે ઈમરાન ખાનની પીટીઆઈને 10, અપક્ષને 6 અને પીપીપીને એક બેઠક મળી છે. આ વિસ્તારમાં 15 નવેમ્બરે મતદાન થયું હતું જેમાં વિરોધ પક્ષોએ ગોટાળાઓનો આરોપ લગાવ્યો હતો.

1963મા ગિલગિટ-બાલ્ટિસ્તાનમાં પોતાની સંયુક્ત સરહદની સ્થાપનાથી ચીન અને પાકિસ્તાન નજીકના સહયોગી રહ્યા છે. 60 બિલિયન અમેરિકન ડોલરના ચીન-પાકિસ્તાન ઈકોનોમિક કોરિડોર (સીપીઈસી)ની શરૂઆત પણ આ વિસ્તારમાંથી જ થઈ હતી. જે અરબ સાગરથી ગ્વાદર સુધી ફેલાયેલો છે. આ વિસ્તારમાં ચીનની ઘણી કંપનીઓ ઈન્ફ્રાસ્ટ્રક્ચર વિકસીત કરી રહી છે. તેમાં ઘણી યોજનાઓ એવી પણ છે જેનો ઉપયોગ સૈન્ય ગતિવિધિઓ માટે થઈ શકે છે.

ગિલગિટ-બાલ્ટિસ્તાનમાં ચૂંટણી કરાવવાની પાકિસ્તાનની યોજનાનો ભારતે શરૂઆતથી જ વિરોધ કર્યો હતો. ભારતીય વિદેશ મંત્રાલયના પ્રવક્તા અનુરાગ શ્રીવાસ્તવે સપ્ટેમ્બરમાં એક ડિજિટલ પ્રેસ બ્રીફિંગમાં કહ્યું હતું કે, સૈન્ય કબ્જાવાળા ગિલગિટ-બાલ્ટિસ્તાનમાં સ્થિતિને બદલવા માટે પાકિસ્તાન દ્વારા કરવામાં આવેલી કોઈ પણ કાર્યવાહીનો કાયદાકિય આધાર નથી અને આ શરૂઆતથી જ અસામાન્ય છે. શ્રીવાસ્તવે કહ્યું હતું કે, અમારી સ્થિતિ સ્પષ્ટ અને સતત છે. જમ્મુ-કાશ્મીર અને લદાખ કેન્દ્ર શાસિત પ્રદેશ અંતર્ગત આવનારો સમગ્ર વિસ્તાર ભારતનું અભિન્ન અંગ રહ્યો છે અને આગળ પણ રહેશે.