સંસદની કેન્ટીનમાં રોટલીથી લઈને નોનવેજ બુફે સુધી બધું થઈ ગયું મોંઘું, જાણો નવો રેટ

નવી દિલ્હી: સંસદની કેન્ટીનમાં સાંસદો અને અન્ય લોકોને ફૂડ પર મળતી સબસિડી બંધ કરી દેવાયા બાદ હવે નવા રેટનું લિસ્ટ જાહેર કરી દેવાયું છે. લોકસભા સેક્રેટરિયેટ (સચિવાલય)એ નવું રેટ લિસ્ટ બહાર પાડ્યું છે. સબસિડી બંધ કરાયા બાદ અહીંની ખાવાનું 3 ગણું મોંઘું થઈ ગયું છે. જેમાં 3 રૂપિયાથી લઈને 700 રૂપિયા સુધીની ખાવાની વસ્તુઓ સામેલ છે. આ રેટ 2 જાન્યુઆરીથી શરૂ થનારા બજેટ સત્ર પહેલા લાગુ કરી દેવાયા છે. એટલે કે, આ સત્રમાં સાંસદોને હવે નવા ભાવથી ખાવાનું મળશે.

સંસદની કેન્ટીનમાં નવા રેટ લિસ્ટ મુજબ, સૌથી સસ્તી રોટલી હશે, જેની કિંમત 3 રૂપિયા હશે. તો, સૌથી મોંઘી વસ્તુ નોનવેજ બફે લંચ હશે, જેની કિંમત 700 રૂપિયા હશે ઉપરાંત વેજ બફે લંચની કિંમત 500 રૂપિયા રાખવામાં આવી છે, જે વેજ વસ્તુઓમાં સૌથી મોંઘી છે.

જૂના ભાવની વાત કરીએ તો, પહેલા એક રોટલીની કિંમત 2 રૂપિયા અને હૈદરાબાદી ચિકન બિરયાનીની કિંમત 65 રૂપયા હતી. તે ઉપરાંત પહેલા 6 રૂપિયામાં આલુ બોંડા, 10 રૂપિયામાં ઢોંસા અને 10 રૂપિયામાં કઢી પકોડા મળતા હતા.

નવા ભાવ મુજબ, ચિકન બિરયાની, ચિકન કટલેટ, ચિકન ફ્રાય અને વેજ થાળીનો ભાવ 100 રૂપિયા નક્કી કરાયો છે. તો, ચિકન કરી માટે 75 રૂપિયા ચૂકવવા પડશે. તે ઉપરાંત મટન બિરયાની અન મટન કટલેટ માટે 150 રૂપિયા અને મટન કરી માટે 125 રૂપિયા ચૂકવવાના રહેશે. બોંડા, બ્રેડ પકોડા, દહીં અને સમોસાનો ભાવ 10 રૂપિયા રાખવામાં આવ્યો છે.


ઉલ્લેખનીય છે કે, લોકસભા અધ્યક્ષ ઓમ બિરલાએ સંસદની કેન્ટીનમાં ભોજન પર અપાતી સબસિડી બંધ કરવાની જાહેરાત કરતા કહ્યું હતું કે, તેનાથી કરોડો રૂપિયાની બચત થશે. એ સમયે તેમણે કહ્યું હતું કે, તેનાથી ભાવ ચોક્કસ વધી જશે, પરંતુ તો પણ તે બજાર કરતા ઓછા હશે.

જણાવી દઈએ કે, કેન્ટીનમાં સબસિડી બંધ કરવાથી લોકસભા સચિવાલયને વાર્ષિક 8 કરોડ રૂપિયાની બચત થશે. સંસદની ભવનની કેન્ટીનોનું બિલ વાર્ષિક લગભગ 20 કરોડ રૂપિયા આવે છે. સંસદની આ કેન્ટીનોનું છેલ્લા 52 વર્ષથી ઉત્તર રેલવે સંચાલન કરતી હતી, પણ હવેથી ભારતીય પર્યટન વિકાસ નિગમ (ITDC) કરશે.