દીપક કે દાસ, નવી દિલ્હીઃ રાજ્યસભાએ પાસ કરેલા મોટર વેહિકલ્સ એક્ટના સુધારાને સોમવારે લોકસભામાં મંજૂરી મળી ગઈ હતી. નવા સુધારા મુજબ ટ્રાફિકના નિયમો તોડવા પર પાંચથી દસ ગણી પેનલ્ટી થશે. કાયદાના આ સુધારાનું નોટિફિકેશન ટૂંક જ સમયમાં રોડ ટ્રાન્સપોર્ટ મિનિસ્ટ્રી બહાર પાડશે. હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો જણાવી દઈએ કે આ કાયદામાં ટુવ્હીલર પર ત્રણ સવારી સામે પણ કડક પગલાની જોગવાઈ છે. નવા કાયદા અનુસાર ટુ વ્હીલર્સમાં બે કરતા વધુ પેસેન્જરને લઈ જવા પર રૂ. 1000નો દંડ થશે અને ડ્રાઈવરનું લાયસન્સ ત્રણ મહિના માટે સસપેન્ડ કરી દેવામાં આવશે. એ સાથે જ જો કારમાં 14 વર્ષથી નાના બાળકને સીટ બેલ્ટ વિના લઈ જવાતુ હશે તો રૂ 1000 નો દંડ ફટકારવામાં આવશે. બિનજરૂરી હોર્ન વગાડતા વાહનચાલકો અને સાઈલેન્સરમાંથી મોટો અવાજ આવતો હોય તેવા વાહનચાલકોને પહેલા ગુના માટે રૂ. 1000 અને ત્યાર પછી માટે રૂ. 2000નો દંડ કરવામાં આવશે. મિનિસ્ટ્રીના અધિકારીઓએ જણાવ્યું કે નવા દંડ અને નિયમો અંગે જલ્દી જ નોટિફિકેશન બહાર પાડવામાં આવશે. ટ્રાન્સપોર્ટેશન મિનિસ્ટ્રીના ટોચના અધિકારીએ જણાવ્યું, “કાયદાની દરેક કલમનું નોટિફિકેશન બહાર પાડવામાં આવશે. વધારાયેલો દંડ કાલથી કે પરમ દિવસથી લાગુ નહિ પડે. જે લોકો નિયમ પાળે છે તેમણે ડરવા જેવું કંઈ જ નથી. જે ગુનો વારંવાર કરશે તેમણે વધુ દંડ ચૂકવવો પડશે. આ તમામ ગુના ઈલેક્ટ્રોનિક રીતે રેકોર્ડ કરવામાં આવશે.” સરકારે ગુનો ભંગ કરનારા ઈલેક્ટ્રોનિક રીતે ઝડપાય તેવી વ્યવસ્થા ઊભી કરી છે. દેશના સ્થાનિક પોલીસ અને કાયદો લાગુ પાડતી એજન્સીઓ આ નવી સિસ્ટમને અમલમાં મૂકશે. કાયદો લાગુ પાડતા અધિકારીને વધુ જવાબદાર બનાવવા માટે જો તે ટ્રાફિકના નિયમોનો ભંગ કરતા પકડાશે તો તેમણે ડબલ પેનલ્ટી ચૂકવવી પડશે. કાયદામાં વર્ષે દંડ 10 ટકા વધે તેવી જોગવાઈ છે. રાજ્યો પાસે દંડને દસ ગણો વધારવાની સત્તા હશે. રાજ્યોની માંગને ધ્યાનમાં રાખતા સરકારે સ્વીકાર્યું છે કે રાજ્ય સરકારોની સહમતિ પછી જ કેન્દ્ર સરકાર નેશનલ ટ્રાન્સપોર્ટ પોલિસી લાવશે.
લોક સભામાં મોટર વેહિકલ કાયદામાં સુધારાને લીલી ઝંડી, નિયમો તોડવા પર હવે દસ ગણી પેનલ્ટી
I am Gujarat 6 Aug 2019, 9:47 am