સરકાર 40 રૂપિયે પેટ્રોલ વેચે, વધારે કિંમત લેવી જનતાનું શોષણ છેઃ સ્વામી

દેશમાં પેટ્રોલની વધી રહેલી કિંમત અંગે ભાજપના નેતા સુબ્રમણ્યન સ્વામીએ પોતાની જ સરકાર પર નિશાન તાક્યું છે. રાજ્યસભા સાંસદે પેટ્રોલ-ડિઝલની વધી રહેલી કિંમતને સરકાર દ્વારા જનતાનું શોષણ ગણાવ્યું છે. સ્વામીએ ટ્વિટ કરીને લખ્યું છે કે, સરકાર 30 રૂપિયા પ્રતિ લિટરની કિંમતે પેટ્રોલ ખરીદે છે અને બાકી 60 રૂપિયા ટેક્સ લાગે છે. પેટ્રોલ અને ડિઝલની કિંમતમાં સતત વધારો થઈ રહ્યો છે. 6 ડિસેમ્બરે મુંબઈમાં પેટ્રોલની કિંમત 90 રૂપિયા પ્રતિ લિટર થઈ ગઈ હતી.

સ્વામીએ ટ્વિટર પર લખ્યું છે કે, 90 રૂપિયા પ્રતિ લિટર પેટ્રોલની કિંમત જનતાનું સરકાર દ્વારા શોષણ છે. પેટ્રોલની કિંમત 30 રૂપિયા પ્રતિ લિટર છે બાકી 60 રૂપિયા જુદા-જુદા પ્રકારનો ટેક્સ છે. મારા મતે પેટ્રોલ વધારેમાં વધારે 40 રૂપિયા પ્રતિ લિટર વેચાવું જોઈએ.
ઈન્ડિયન ઓઈલ કોર્પોરેશનની વેબસાઈટ પર અપલોડ કરવામાં આવેલા ડેટા પ્રમાણે દિલ્હીમાં પેટ્રોલની બેઝ પ્રાઈઝ (1 ડિસેમ્બરથી) 26.34 રૂપિયા પ્રતિ લિટર હતી. તેના પર વધારાના ટેક્સ અને ડ્યુટીના કારણે પેટ્રોલની કિંમત 82.34 થઈ થાય છે. સ્વામીએ મુંબઈમાં પેટ્રોલની કિંમતના આધારે પોતાની વાત રજૂ કરી છે.

રિપોર્ટ્સ પ્રમાણે હાલમાં કેન્દ્ર દ્વારા પેટ્રોલ અને ડિઝલ પર 30 રૂપિયા જેટલો ટેક્સ લગાવવામાં આવ્યો છે. જેમાં બેઝિક એક્સાઈઝ, સ્પેશિયલ એડિશનલ એક્સાઈઝ અને રોડ અથવા ઈન્ફ્રા સેસનો સમાવેશ થાય છે.