પતિના પાસપોર્ટ પર પ્રેમીને લઈ ગઈ ઓસ્ટ્રેલિયા, લોકડાઉન થયું અને....

પીલીભીતઃ યુપીના પીલીભીતમાં એક 36 વર્ષની મહિલા પોતાના પતિના પાસપોર્ટ પર પ્રેમીને લઈને ઓસ્ટ્રેલિયા તો ગઈ પરંતુ વિશ્વવ્યાપી લૉકડાઉનના કારણે તે ત્યાં જ ફસાઈ ગઈ હતી. જ્યારે તેઓ પરત ફર્યા તો બન્નેનું આ સિક્રેટ જાહેર થઈ ગયું હતું. બન્ને 6 જાન્યુઆરીના રોજ ઓસ્ટ્રેલિયા ગયા હતા અને તેમને માર્ચમાં પરત આવવાનું હતું પરંતુ લોકડાઉનના કારણે તેઓ 24 ઓગસ્ટના રોજ આવ્યા.

નકલી ડોક્યુમેન્ટથી બનાવ્યો પાસપોર્ટ
જ્યારે તેઓ પરત આવ્યા ત્યારે 46 વર્ષના પતિએ પોલીસમાં ફરિયાદ કરી કે, તેની પત્નીનું સંદીપ સિંહ (ઉંમર વર્ષઃ 36) સાથે અફેર ચાલી રહ્યું છે. બન્નેએ નકલી ડોક્યુમેન્ટના આધારે તેમના નામ પર પાસપોર્ટ બનાવ્યો હતો. આ કપલના બાળકો ઓસ્ટ્રેલિયામાં અભ્યાસ કરે છે.

મુંબઈમાં નોકરી કરે છે પતિ
આ આરોપોને ગંભીરતાથી લેતા એસપી જયપ્રકાશ યાદવે આ ઘટના મામલે તપાસના આદેશ આપ્યા હતા અને પતિની ફરિયાદના આધારે FIR નોંધવામાં આવી હતી. જેમાં કહેવામાં આવ્યું કે ફરિયાદ કરનાર પતિ 20 વર્ષથી મુંબઈમાં કામ કરે છે અને ક્યારેક જ પત્નીને મળવા માટે આવે છે. તેની પત્ની પીલીભીતમાં ફાર્મહાઉસ અને ખેતરની દેખભાળ રાખે છે.

આ રીતે થયો ભાંડાફોડ
મહિલાના પતિનું કહેવું છે કે, 'જ્યારે હું 18 મેના રોજ ઘરે પરત ફર્યો ત્યારે જોયું કે પત્ની ઘરે નથી. જે પછી મને સંદીપના પરિવાર પાસેથી જાણવા મળ્યું કે, બન્ને ઓસ્ટ્રેલિયા ગયા છે. પછી મને શંકા ગઈ. ક્યાંક સંદીપ મારા નામ પર તો પાસપોર્ટ બનાવીને વિદેશ યાત્રા પર નથી ગયો ને? એ જાણવા માટે જ્યારે મેં બરેલીમાં પાસપોર્ટ માટે અરજી આપી. ત્યાંથી મને જાણવા મળ્યું કે, 2 ફેબ્રુઆરી 2019ના રોજ પહેલા જ મારા નામ પર પાસપોર્ટ ઈશ્યૂ થઈ ચૂક્યો છે.' એસપીનું કહેવું છે કે, હવે એ મામલે તપાસ કરવામાં આવશે કે આ નકલી પાસપોર્ટ કઈ રીતે બની ગયો?