કબીરનો દોહો, રામચરિતમાનસ ... પીએમ મોદીએ આ રીતે સમજાવી કોરોનાની ગંભીરતા

નવી દિલ્હી: પીએમ નરેન્દ્ર મોદીએ રાષ્ટ્રજોગ સંદેશમાં કોરોના વાયરસ પત્યે બેદરકારી ન રાખવાની અપીલ કરી. પીએમએ કહ્યું કે, હજુ લોકડાઉન જ હટ્યું છે, વાયરસ નથી ગયો. તેમણે દેશવાસીઓને કોરોનાની ગંભીરતા સમજાવતા કબીરનો એક દોહો અને રામચરિતમાનસની ચોપાઈનું ઉદાહરણ પણ આપ્યું.

પકી ખેતી દેખિકે, ગરબ કિયા કિસાન. અજહું ઝોલા બહુત હૈ, ઘર આવૈ તબ જાન.
પીએમ મોદીએ પોતાના સંબોધનમાં કબીરના આ દોહાનો ઉલ્લેખ કરતા સમજાવ્યું કે, ઊગી ગયેલા પાકને જોતાં જ અતિ આત્મવિશ્વાસમાં આવી જાય છે કે, હવે તો કામ થઈ ગયું. પરંતુ, જ્યાં સુધી સફળતા પૂરી ન મળી જાય, બેદરકારી ન રાખવી જોઈએ. જ્યાં સુધી આ મહામારીની વેક્સીન ન આવી જાય, આપણે આ લડાઈને નબળી પડવા દેવાની નથી.

રિપુ રુજ પાવક પાપ પ્રભુ અહિ ગનિઅ ન છોટ કરિ.
રામચરિતમાનસમાં ઘણી શિક્ષિત કરનારી વાતો છે. સાથે-સાથે ઘણા પ્રકારની ચેતવણીઓ પણ છે. કોરોના સંક્રમણના સંદર્ભમાં તેનો અર્થ સમજાવતા પીએમએ કહ્યું કે, આગ, રોગ, શત્રુ, બીમારીને નાની ન સમજવી જોઈએ. ક્યારેય હળવાશથી ન લેવી જોઈએ.

'લોકડાઉન જ પુરું થયું છે, હજુ વાયરસ નથી ગયો'
પીએમ મોદીએ કહ્યું કે, તહેવારોમાં બજારોમાં રોનક જોવા મળી રહી છે. યાદ રાખો કે હજુ લોકડાઉન જ પુરું થયું છે, પરંતુ હજુ વાયરસ નથી ગયો. પીએમ મોદીએ કહ્યું કે, વર્ષો પછી આપણે એવું જોઈ રહ્યા છીએ કે, માનવતાને બચાવવા માટે યુદ્ધસ્તર પર કામ થઈ રહ્યું છે. ઘણા દેશ તેના માટે કામ કરી રહ્યા છે. આપણા દેશના વૈજ્ઞાનિક પણ વેક્સીન માટે સતત પ્રયાસ કરી રહ્યા છે. ભારતમાં હાલમાં કોરોનાની ઘણી વેક્સીન પર કામ ચાલી રહ્યું છે.

'બેદરકારી રાખવી યોગ્ય નથી'વડાપ્રધાને કહ્યું કે, સેવા પરમો ધર્મ:ના મંત્ર પર ચાલતા આપણા ડોક્ટર્સ, નર્સ, હેલ્થ વર્કર્સ આટલી મોટી વસ્તીની નિસ્વાર્થ સેવા કરી રહ્યા છે. આ બધા પ્રયાસો વચ્ચે, આ સમય બેદરકારી રાખવાનો નથી. આ સમય એ માની લેવાનો નથી કે કોરોના જતો રહ્યો, કે પછી હવે કોરોનાથી કોઈ ખતરો નથી. હાલના દિવસોમાં આપણે ઘણી એવી તસવીરો, વિડીયો જોઈ રહ્યા છીએ, જેમાં સ્પષ્ટ જોવા મળે છે કે ,ઘણા લોકોએ હવે સાવચેતી રાખવાનું બંધ કરી દીધું છે. એ યોગ્ય નથી.