PM Modi Degree: પીએમ મોદીની ડિગ્રીની વિગતો જાહેર નહીં થાય, ગુજરાત હાઈકોર્ટે કેજરીવાલને દંડ ફટકાર્યો

PM Modi Degree News: વડાપ્રધાન નરેન્દ્ર મોદીની ડિગ્રી અને અભ્યાસનો વિવાદ ફરી એક વખત ચગ્યો છે. સેન્ટ્રલ ઈન્ફોર્મેશન કમિશન (CIC)એ નરેન્દ્ર મોદીની ડિગ્રીની વિગત જાહેર કરવા માટે 2016માં ગુજરાત યુનિવર્સિટીને ઓર્ડર આપ્યો હતો. પરંતુ ગુજરાત હાઈકોર્ટે આજે આ ઓર્ડર ફગાવી દીધો છે. મોદીની ડિગ્રી વિશેની માહિતી દિલ્હીના મુખ્યમંત્રી અરવિંદ કેજરીવાલે માંગી હતી. આ મુદ્દે હાઈકોર્ટે અરવિંદ કેજરીવાલને ફટકાર લગાવી છે અને તેમને 25,000 રૂપિયાનો દંડ પણ ફટકાર્યો છે.


મોદીની ડિગ્રીની વિગતો કેજરીવાલને આપવા માટે સીઆઈસીએ 2016માં ગુજરાત યુનિવર્સિટીને સૂચના આપી હતી. ગુજરાત યુનિવર્સિટીએ આ આદેશ પડકાર્યો હતો. યુનિવર્સિટીનું કહેવું હતું કે CICએ તેને નોટિસ આપ્યા વગર ડિગ્રી વિશે ઓર્ડર આપ્યો હતો. આ બાબતને ધ્યાનમાં રાખીને જસ્ટિસ બિરેન વૈષ્ણવે ગુજરાત યુનિવર્સિટીની અપીલ માન્ય રાખી હતી. આ અંગે સંબંધિત પક્ષોને સાંભળ્યા પછી 9 ફેબ્રુઆરીએ ચુકાદો અનામત રાખવામાં આવ્યો હતો.

કેન્દ્રિય માહિતી આયોગ એટલે કે CICએ મોદીની ડિગ્રીની વિગતો આપવા માટે ગુજરાત યુનિવર્સિટીને જે આદેશ આપ્યો હતો તે પણ આ સાથે રદ કરવામાં આવ્યો છે.

અરવિંદ કેજરીવાલે દંડ ભરવો પડશે
ગુજરાત હાઈકોર્ટે દિલ્હીના મુખ્યમંત્રી અરવિંદ કેજરીવાલની ઝાટકણી કાઢીને તેમને 25 હજાર રૂપિયાનો દંડ કર્યો છે. કેજરીવાલે ચાર અઠવાડિયાની અંદર ગુજરાત સ્ટેટ લીગલ સર્વિસ ઓથોરિટીને આ દંડ ભરવાનો રહેશે. કોર્ટે આ જજમેન્ટ પર સ્ટે આપવાનો પણ ઈનકાર કર્યો હતો.

તત્કાલિન માહિતી કમિશનર ડો. શ્રીધર અચર્યુલુએ આ વિવાદમાં મોદીની શૈક્ષણિક લાયકાત અંગે સુઓ મોટો નિર્ણય લીધો હતો તેમ કહેવામાં આવ્યું છે. કેજરીવાલના ચૂંટણી ઓળખપત્રને લગતી એક અરજી પર સુનાવણી કરતી વખતે CICએ સુઓ મોટો આદેશ આપ્યો હતો. તે સમયે કેજરીવાલે CICની ટીકા કરીને કહ્યું હતું કે કમિશન પારદર્શક રીતે કામ નથી કરતું. કેજરીવાલે કહ્યું હતું કે હું મારા વિશે જરૂરી માહિતી આપવા માટે તૈયાર છું. પરંતુ વડાપ્રધાન નરેન્દ્ર મોદીએ પણ તેમની ડિગ્રીની વિગત આપવી જોઈએ જેથી તેના વિશે કોઈના મનમાં શંકા ન રહે.

તેના પગલે CICએ દિલ્હી યુનિવર્સિટીમાંથી મોદીની BAની ડિગ્રી અને ગુજરાત યુનિવર્સિટીમાંથી MAની ડિગ્રી, તેનો નંબર અને વર્ષની વિગત આપવા આદેશ આપ્યો હતો. ગુજરાત યુનિવર્સિટી આ આદેશ સામે હાઈકોર્ટમાં ગઈ હતી.