હાથરસ કાંડઃ નિર્ભયાનો કેસ લડનારા વકીલ લડશે પીડિતાનો કેસ, તેમને ગામમાં ન જવા દેવાયા

હાથરસ કેસમાં મૃતક યુવતીના પરિવારને મળવા માટે જઈ રહેલા નિર્ભયા કેસના વકીલ સીમા કુશવાહાને અટકાવી લીધા. હાથરસના એડીએમની વકીલ સાથે ઉગ્ર બોલાચાલી થઈ ગઈ. તણાવ વચ્ચે સીમા કુશવાહાએ એડીએમને કહી દીધું કે તમારા જેવા લોકોના કારણે જ રેપ થાય છે. તો જવાબમાં એડીએમ જેપી સિંહે પણ તેમના પર પલટવાર કર્યો.

સીમા કુશવાહાએ કહ્યું કે હાથરસ ગેંગરેપની પીડિતાના પરિવારે મને બોલાવી હતી. ન્યૂઝ એજન્સી એએનઆઈ મુજબ, સીમા કુશવાહાએ કહ્યું, પરિવાર ઈચ્છે છે કે હું તેમના વકીલ તરીકે આ કેસને લડું, પરંતુ પ્રશાસન મને પરિવારને મળવા નથી દઈ રહ્યો. પ્રશાસનનું કહેવું છે કે તેનાથી કાયદો અને વ્યવસ્થા ખરાબ થશે.

નિર્ભયાનો કેસ લડનારા અને દોષીઓને મોતની સજા અપાવનારા વકીલ સીમા કુશવાહા ગુરુવારે હાથરસ પહોંચ્યા હતા. ત્યાં પીડિતાના પરિવારને મળવા ઈચ્છતા હતા, પરંતુ પ્રશાસને તેમને અટકાવી દીધા.


સીમા કુશવાહાએ કહ્યું, હાથરસની દીકરીને પોલીસે પેટ્રોલ નાખીને સળગાવી છે. મેં નિર્ભયાને ન્યાય અપાવ્યો છે. તેને પણ ન્યાય અપાવીશ. તેનો પણ કેસ લડીશ. તેમણે કહ્યું કે, ભારતમાં કોઈપણ પ્રોફેશનની મહિલાઓ આ દાવો નથી કરી શકતી કે તે સુરક્ષિત છે.

ઉલ્લેખનીય છે કે 16 સપ્ટેમ્બર 2012એ દિલ્હીમાં થયેલા નિર્ભયા ગેંગરેપ કાંડની કાયદાકીય લડાઈ સમી કુશવાહાએ લડી હતી. તેમણે ડિસ્ટ્રીક કોર્ટથી લઈને સુપ્રીમ કોર્ટ સુધી કાયદાની લડાઈ લડી અને નિર્ભયાના દોષીઓને 20 માર્ચ 2020માં ફાંસી આપવામાં આવી હતી.

બીજી તરફ હાથરસની વાત કરીએ તો પોલીસે પીડિતાના ગામમાં લોખંડી સુરક્ષા બંદોબસ્ત કરી દીધો છે. પીડિતાના પરિવારજનોને મીડિયાવાળા અને નેતાને પણ મળવાની પરવાનગી આપવામાં આવી રહી નથી. કેટલાક લોકોએ ગામમાં પ્રવેશવાનો પ્રયાસ કર્યો તો બપોર ગામમાં બેરિકેડ્સ લગાવી દેવામાં આવ્યા. પોલીસનું કહેવું છે કે ઉપરથી આદેશ છે. ગામમાં જવાની મંજૂરી ન આપી શકીએ. મીડિયાએ સવાલો પૂછતા સવારે એડએમ ત્યાંથી જતા રહ્યા હતા. બીજી તરફ ટીએમસીના સાંસદને પણ ધક્કા-મુક્કી કરીને આજે નીચે પાડી દેવાયા હતા. એવામાં સવાલ ઉઠે છે કે હાથરસની આ કિલ્લેબંધી પાછળ શું કારણ છે? સરકાર ગામમાં મીડિયાને જવા દેવાથી કેમ આટલી ડરી રહી છે? આ તમામ સવાલો પર ટોચના અધિકારીઓ મૌન છે. જ્યારે યોગી સરકારના મંત્રીઓ પર ચુપ છે.