ધૂળ ખાઈ રહ્યાં હતાં જપ્ત કરાયેલા વાહનો, પોલીસે ઉગાડ્યા ઓર્ગેનિક શાકભાજી

કેરળના ત્રિશૂર જિલ્લાના ચેરુથુર્થી પોલીસ સ્ટેશનના સોશિયલ મીડિયા પર ખૂબ જ વખાણ થઈ રહ્યાં છે. હકીકતમાં વર્ષ 2019ના એક રિપોર્ટ અનુસાર, રાજ્યના પોલીસ સ્ટેશનમાં 40000થી વધારે વાહન ધૂળ ખાઈ રહ્યાં છે. જેમાંથી કેટલાક વાહન લાવારિસ છે તો કેટલાક જપ્ત કરાયેલા છે. જેમાં તમને ટૂ વ્હીલરથી લઈને ભારે વાહન પણ જોવા મળે છે. હવે વાત જ એવી છે કે વર્ષોથી પોલીસ સ્ટેશનના વિસ્તારમાં પડેલા વાહનો ધૂળ ખાઈ રહ્યાં હતાં અને કાટ પણ લાગતો હતો. તો ચેરુથુર્થી પોલીસ સ્ટેશનના કર્મચારીઓએ વિચાર્યું કે શા માટે કંઈક ક્રિએટિવ ન કરવામાં આવે? આ કારણે તેમણે ઓર્ગેનિક ખેતી કરી. તેમનો આ આઈડિયા છવાઈ ગયો અને હવે શાકભાજી કેન્ટિનમાં પણ કામ આવી રહ્યાં છે.

પોલીસ ઓફિસર સાથે ખેડૂત પણ
'ધ ન્યૂઝ મિનિટ' અનુસાર, આ ધૂળ ખાઈ રહેલા વાહનોમાંથી કેટલાક ચેરુથુર્થી પોલીસે ઓર્ગેનિક શાકભાજી ઉગાડવાના શરુ કર્યા હતાં. જેની જવાબદારી રંગરાજે લીધી હતી. રંગરાજ, સિવિલ પોલિસ અધિકારી હોવાની સાથે સાથે એક ખેડૂત પણ છે. તેમણે ઓફિસર્સ સાથે આ સુંદર કામને પૂરું પાડ્યું હતું. ખેતીના પહેલા તબક્કામાં તેમણે ભીંડા, પાલખ અને ફળ પણ ઉગાડ્યા હતાં.

ત્રણ મહિના પહેલા થઈ હતી શરુઆત
એક રિપોર્ટ અનુસાર, રેતી અને માટીની દાણચોરી કરનાર કેટલીક મીની લારીઓ પણ પોલીસે જપ્ત કરી હતી. જેમાં ત્રણ મહિના પહેલા શાકભાજી ઉગાડવાનો નિર્ણય લીધો હતો. પોલીસની આ કોશિશ સફળ થઈ અને પોલીસકર્મીને તેમનો પહેલો પાક ગયા અઠવાડિયે મળ્યો. હવે જ્યારે પાક સારો છે ત્યારે તેઓ ખેતીનો વિસ્તાર વધારવાની યોજના બનાવી રહ્યા છે. જેનો અર્થ એવો કે, પોલીસ હવે વાહનોમાં વધુ શાકભાજી ઉગાડશે.

આ માટે વાહનમાં લાગે છે કાટ
નોર્થ કેરલના એક SHOએ કહ્યું કે,'જો કોઈ વાહનને ગેરકાનૂની રીતે જપ્ત કરવામાં આવે છે તો તેના માલિક ક્યારેય પણ દાવો નહીં કરે. સામાન્ય રીતે માત્ર ડ્રાઈવર જ પકડાઈ જાય છે. દુર્ઘટનાગ્રસ્ત વાહનોના મામલે અનેકવાર કોર્ટના આદેશ પછી પણ માલિકો દ્વારા તેને પરત લેવામાં નથી આવતાં. અન્ય મામલાઓમાં કેટલાક વર્ષ પણ લાગી જાય છે. આથી વાહનમાં કાટ લાગવા લાગે છે.'