પતિએ લોકડાઉનમાં ગુમાવી નોકરી તો પૈસા કમાવા પત્ની બની બસ ડ્રાઈવર

જમ્મુ-કાશ્મીરના પૂજા દેવી નામના આ મહિલાએ ઈતિહાસ રચ્યો છે કારણકે તેઓ જમ્મુના પ્રથમ મહિલા ડ્રાઈવર બની ગયા છે. કેટલાંક વર્ષો પહેલા તેમણે ડ્રાઈવિંગ શીખવા માટે ટેક્સી ચલાવી હતી અને બાદમાં તેમણે જમ્મુમાં ટ્રક ચલાવ્યો હતો. હવે તેઓ સ્થાનિક ટ્રાન્સપોર્ટરની બસ ચલાવવાનું કામ કરી રહ્યા છે. તેમણે વધુ અભ્યાસ નથી કર્યો પણ તેઓને એવું લાગે છે કે આ કામ તેમના માટે બેસ્ટ છે.

33 વર્ષીય પૂજા દેવી નામના આ મહિલાના પતિ હૈદરાબાદમાં કન્સ્ટ્રક્શન વર્કર તરીકે કાર્યરત હતા પણ કોરોનાની મહામારીના કારણે લાગુ લોકડાઉનમાં તેમણે પોતાની નોકરી ગુમાવી દીધી. ત્યારે ઘર ચલાવવા માટે આવક જરૂરી હોવાથી આ મહિલાએ બસ ડ્રાઈવર તરીકેનું કામ શરૂ કર્યું. તેમણે જણાવ્યું કે ઘરનું ભાડું ભરવું, દરરોજ જમવાની વ્યવસ્થા કરવી અને બાળકો સહિત પરિવાર સંભાળવા માટે આવકની જરૂર હતી.

તેમણે આ વિશે વધુ વાત કરતા જણાવ્યું કે ગત અઠવાડિયે જ્યારે મને એક દિવસના 600 રૂપિયા મળ્યા ત્યારે મને એ વાતનો અહેસાસ થયો કે કોરોનાકાળમાં કોઈએક દિવસની આ અમારી સૌથી વધારે કમાણી હતી. મેં કોરોના અને લોકડાઉનને એક પડકારરૂપે જોયા. મારી પ્રાઈવેટ ટેક્સી ડ્રાઈવર તરીકેની નોકરીમાં હું ઉત્તરાખંડથી દિલ્હી સહિત પંજાબ ગઈ પણ ક્યારેય કાશ્મીર ટ્રાવેલ કર્યું નથી. મેં હંમેશાં કાશ્મીરની સુંદરતા વિશે સાંભળ્યું છે પણ ક્યારેય ત્યાં ગઈ નથી, અમે ક્યારેય જમ્મુમાં પટનીટોપ પણ નથી ગયા કારણકે અમારી વાર્ષિક બચત ક્યારેય રૂપિયા 15 હજારથી વધુ થઈ નથી.