કુનુરઃ તામિલનાડુના ડી. સિવન ગત અઠવાડિયે જ રિટાયર થયા હતાં. ડી સિવન ભલે કોઈ સેલિબ્રિટી નથી પરંતુ તેમની લોકપ્રિયતા પણ અખૂટ છે. તેઓ સાધારણ પોસ્ટમેન છે પરંતુ તેમના કામ અસાધારણ છે. તેઓ કુનુરની નીલગીરીમાં દુર્ગમ પહાડી વિસ્તારમાંથી થઈને લોકોના ઘર સુધી લેટર પહોંચાડતા હતાં. ખાસ વાત તો એ રહી કે પહાડીઓમાં ગાડીની વાત તો દૂર રહી સાયકલ પણ ચાલી શકતી નથી. આ કારણે તેઓ રોજ ચિઠ્ઠી વહેંચવા માટે જતા હતાં. આ દરમિયાન તેમને રોજ આશરે 15 કિલોમીટરનો પહાડી અને જંગલનો રસ્તો નક્કી કરવો પડતો હતો.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
જંગલી હાથી પણ કરતા હતા પીછો
સિવન જ્યારે લોકોને ટપાલ પહોંચાડવા જતા ત્યારે અનેકવાર જંગલી હાથી તેમનો પીછો કરતા. તેમણે સ્લોથ બેયર સહિત અનેક જંગલી જાનવરોને પણ ભગાડ્યા છે. પરિવારની ચિંતા અને પોતાના જીવને જોખમમાં મૂકીને પણ તેઓ પોતાના કર્તવ્યથી ક્યારેય પીછેહઠ ન કરી. તેઓ હંમેશા એ કહેતા હતાં કે તેઓ જ્યાં સુધી જીવતા છે અથવા તો જ્યાં સુધી રિટાયર નથી થયા ત્યાં સુધી પોતાની ડ્યૂટી નહીં છોડે.
ડર અને મુશ્કેલીઓથી પીછેહઠ નહીં
ડી સિવન મોટાભાગે નિલગિરી માઉન્ટેન રેલવે ટ્રેક સાથે જ ચાલતા હતાં. તેમને પહાડ પણ ચડવો પડતો હતો. ભારે ઉતાર ચડાવવાળા રસ્તા પાર કરવા પડતા હતાં. તેઓ દરેક મુશ્કેલીઓ પાર કરીને બુરીલિયાર પાસે સિંગાર એસ્ટેટ પર જંગલો પાસે રહેતા બગીચામાં કામ કરતા શ્રમિકો સુધી તેમના પત્ર અને પેન્શન પહોંચાડતા હતાં.
અંધારભરી સુરંગ પણ કરતા હતા પાર
સિવનને પોતાની યાત્રા દરમિયાન સુરંગ પણ પાર કરવી પડતી હતી. સુરંગ પાર કર્યા દરમિયાન અંદર ઘોર અંધારુ પણ હોતું હતું. અંધારામાં જાનવર છૂપાયેલા હોવાનો પણ ભય રહેતો હતો પરંતુ તેઓ ડર્યા નહીં.
નોકરી નહીં, કહેતા હતા ‘મારી ડ્યૂટી છે’
સિવન ગત અઠવાડિયે જ 65 વર્ષની ઉંમરમાં રિટાયર થયાં છે. તેમને 12,000 રુપિયા દર મહિને પગાર મળતો હતો. જોકે, તેમણે ક્યારેય ઓછો પગાર હોવાની ફરિયાદ ન કરી કે ન તો દુર્ગમ વિસ્તારમાં પોસ્ટિંગને લઈને ફરિયાદ કરી. સિવને કહ્યું કે તેઓ પોતાનું કામ નોકરીની જેમ નહીં પરંતુ ડ્યૂટી તરીકે કરતા હતાં. તેમને આ કામ કરવામાં અત્યંત મજા આવતી હતી.