ભાઈ NSG કમાન્ડો, બહેન પતિ સાથે ISISમાં જોડાઈ!

તિરુવનંતપુરમ્: તિરુવનંતપુરમની બિંદુ કુમાર અત્યારે આઘાતમાં છે. તેને પુત્ર NSG કમાન્ડો હોવાનો ગર્વ તો છે, પરંતુ વિડંબણા એ છે કે, તેની પુત્રી આતંકવાદી સંગઠન ઇસ્લામિક સ્ટેટ (IS)માં સામેલ થઈ ગઈ છે. બિંદુ રડતાં રડતાં જણાવે છે કે, તેની સીધીસાદી પુત્રી IS તરફ આકર્ષાઈ ગઈ તેની તેને ખબર જ ન પડી. કેરળમાંથી ISમાં જોડાયેલા 17 શંકાસ્પદ લોકોમાં બિંદુની પુત્રી પણ સામેલ છે.

બિંદુ રવિવારે મુખ્યપ્રધાન પિનરાઈ વિજયનને મળી હતી અને તેમને આ મામલે તપાસ કરાવવા કહ્યું હતું. બિંદુની પુત્રીએ લગ્ન બાદ ધર્મ પરિવર્તન કરી ઇસ્લામ અંગિકાર કર્યો હતો. બિંદુએ કહ્યું હતું કે, તેની 25 વર્ષીય પુત્રી નિમિષા તેના પતિ સાથે 16મી મેએ ઘરે આવી હતી. તેણે 18મી મેએ ફોન કરી કહ્યું હતું કે તે કોઈ કામથી શ્રીલંકા જઈ રહી છે. વારંવાર પૂછવા છતાં તેણે ફોન ક્યાંથી કર્યો છે તે નહોતું જણાવ્યું. ચોથી જૂન સુધી તે સંપર્કમાં હતી, પરંતુ ત્યાર બાદ તેના વિશે કોઈ માહિતી મળી નહોતી. નિમિષા ગર્ભવતી પણ હતી.

બિંદુએ કહ્યું છે કે, તેની પુત્રી નિમિષા કોલેજમાં એક મુસ્લિમ યુવકને મળી હતી અને તેની સાથે લગ્ન કરી લીધાં હતાં. એ સમયે તે કાસરગોડમાં ડેન્ટલના અંતિમ વર્ષમાં અભ્યાસ કરી રહી હતી. બાદમાં નિમિષાએ તેના પતિ સાથે ધર્મ પરિવર્તન કરી ઇસ્લામ કબૂલી લીધો હતો. બંનેએ નવેમ્બર, 2015માં લગ્ન કરી લીધાં હતાં. એક પોલીસ અધિકારીએ રવિવારે કહ્યું હતું કે, કેટલાક લોકો ISમાં જોડાયા હોવાના અહેવાલ છે. આ અંગે તપાસ ચાલી રહી છે. ઘણી કેન્દ્રીય એજન્સીઝ આ પ્રકારના અહેવાલોની વિશ્વસનીયતા તપાસી રહી છે. લાપતા લોકોમાં 10 પુરુષ અને સાત મહિલાઓ છે, જેમાંથી મોટે ભાગે કેરળના કાસરગોડ જિલ્લાની છે.