ના હોસ્પિટલ, ના પાક્કો રોડ....ગર્ભવતી મહિલાને ઝોળીમાં લઈ જવી પડી, જન્મતાંવેત ગુમાવ્યા જોડિયા બાળકો

મુંબઈ- તાજેતરમાં જ 15મી ઓગસ્ટના રોજ દેશભરમાં આઝાદીના અમૃત મહોત્સવની ઉજવણી કરવામાં આવી. વડાપ્રધાન નરેન્દ્ર મોદીએ લાલ કિલ્લા પરથી આહ્વાન કર્યું કે આગામી 25 વર્ષોમાં વિકાસશીલ ભારતને વિકસિત ભારત બનાવવામાં આવશે. પરંતુ પ્રશ્ન એ ઉભો થઈ રહ્યો છે કે શું આઝાદીના 75 વર્ષ પછી પણ દેશના તમામ વર્ગના લોકોને સ્વાસ્થ્ય, શિક્ષણ જેવી પ્રાથમિક સુવિધાઓ પણ મળી છે? દેશના મુખ્ય અને મોટા શહેરોમાંથી એક મુંબઈથી 160 કિમી દૂર પાલઘરમાં એક 26 વર્ષીય મહિલાને પ્રસૂતિની પીડા ઉપડી, પણ તે જ્યાં રહે છે ત્યાં પાક્કો રસ્તો નથી, હોસ્પિટલ નથી, જેના કારણે તેણે ઘરે જ બાળકોને જન્મ આપવો પડ્યો. શનિવારના રોજ આ ઘટના બની હતી, અને દુર્ભાગ્યવશ જન્મ સમયે જોડિયા બાળકો મૃત હતા.

Rajasthan: શિક્ષકના મારને કારણે થયું દલિત વિદ્યાર્થીનું મોત, ઘટનાથી વ્યથિત કોંગ્રેસના ધારાસભ્યએ આપ્યંં રાજીનામું
જોડિયા બાળકોના જન્મ પછી મહિલાને ઝોળીમાં બેસાડીને 3 કિલોમીટર દૂર મુખ્ય રસ્તા સુધી લઈ જવામાં આવી હતી, અને અહીંથી એક એમ્બ્યુલન્સ તેને ગ્રામીણ હોસ્પિટલમાં લઈ ગઈ હતી. અત્યારે મહિલાની સ્થિતિ સ્થિર હોવાની જાણકારી મળી છે પણ તેણે પોતાના જોડિયા બાળકો ગુમાવ્યા છે. મહિલા મોખાડા(Mokhada)માં આદિવાસી વસાહતોમાં રહે છે, જે ડુંગરાળ વિસ્તારમાં છે. અહીં જ્યારે પણ કોઈ વ્યક્તિ બીમાર હોય અથવા તો ગર્ભવતી મહિલાને હોસ્પિટલ લઈ જવી હોય તો ઝોળી તૈયાર કરીને લઈ જવામાં આવે છે.

થોડા સમય પહેલા જ સોશિયલ મીડિયા પર બીમાર માણસોને આ પ્રકારે લઈ જતાં વીડિયો વાયરલ થયા હતા, જેના પરિણામે જિલ્લા કલેક્ટર ગોવિંદ બોડકે અહીંના અમુક ગામોની મુલાકાતે આવ્યા હતા. શનિવારના રોજ વંદના બુધર નામની એક ગર્ભવતી મહિલાને પ્રસૂતિની પીડા ઉપડી હતી. તે સાત મહિના ગર્ભવતી હતી. તેના પરિવારે તાત્કાલિક આશા વર્કર મહિલાને બોલાવી જેમણે 108 પર ફોન કર્યો હતો. મહિલાનું ઘર તળેટી પર હોવાને કારણે મુખ્ય રોડ પર પહોંચવું પડકારજનક કામ હતું. મહિલાને રોડ સુધી લાવવા માટે ઝોળી તૈયાર કરવામાં આવે ત્યાં સુધી તો તેણે જોડિયા બાળકોને જન્મ આપી દીધો, પરંતુ દુર્ભાગ્યવશ બન્ને જન્મ સમયે મૃત અવસ્થામાં હતા.

અનોખી પહેલ: મહિલા ધારાસભ્યએ સરકારી હોસ્પિટલના જનરલ વોર્ડમાં બાળકને જન્મ આપ્યો
લોહીલુહાણ વંદનાને પતિ યશવંત અને અન્ય સ્થાનિક યુવકે ઉંચકીને રસ્તા સુધી લાવ્યા. વરસાદ હોવાને કારણે તેમણે ઝરણાઓમાંથી પણ પસાર થવુ પડ્યુ હતું, રસ્તા પણ લપસણા થઈ ગયા હતા. મુખ્ય રસ્તા પર એમ્બ્યુલન્સ ઉભી હતી જેમાં નજીકની ખોડાલા પ્રાઈમરી હેલ્થ સેન્ટર લઈ જવામાં આવી. સ્વાસ્થ્ય કર્મચારીઓનું કહેવું છે કે, વંદના હેલ્થ વર્કર્સના સંપર્કમાં નહોતી અને તેણે PHCની પણ મુલાકાત નહોતી લીધી. એક તબીબ જણાવે છે કે, મોટાભાગની તમામ ગર્ભવતી આદિવાસી મહિલાઓ અંડરવેઈટ હોય છે. તેઓ સમયસર ચેક-અપ માટે પણ નથી આવતી. એક ગામમાં માત્ર એક જ આશા વર્કર હોય છે. હેલ્થ વર્કર માટે તેમની પાસે પહોંચીને કાઉન્સિલિંગ કરવું મુશ્કેલ બની જાય છે.

પૂર્વ ધારાસભ્ય અને સામાજિક કાર્યકર્તા વિવેક પંડિત જણાવે છે કે, મુખ્ય રસ્તાથી 15-20 કિમી દૂર ઘણાં ગામ છે. મોટાભાગના ગામ સુધી પહોંચવાનો રસ્તો વ્યવસ્થિત નથી અને આ પ્રકારે ઝોળીનો ઉપયોગ કરવામાં આવે છે. રસ્તા બનાવવા માટે ભંડોળ અને મેનપાવર બન્ને ઉપલબ્ધ છે, પરંતુ સરકાર અને તંત્રની ઈચ્છાશક્તિ ન હોવાને કારણે આ સ્થિતિ સર્જાઈ છે.