રિક્ષાવાળાએ કપલને પરત કરી બેગ કે જેમાં હતો 7 લાખ રૂપિયાનો કિંમતી સામાન

પૂના: જ્યાં એકબાજુ લોકો કોરોના વાયરસની મહામારીના કારણે આર્થિક તંગીનો સામનો કરી રહ્યા છે ત્યાં બીજી બાજુ મહારાષ્ટ્રના પૂના શહેરના 60 વર્ષીય રિક્ષાવાળાએ રૂપિયા 7 લાખથી ભરેલી બેગ તેના માલિકને પરત કરીને ઈમાનદારીનું ઉદાહરણ પૂરું પાડ્યું છે.

પોલીસે જણાવ્યું કે બુધવારે પૂનાના કેશવ નગર વિસ્તારમાં રિક્ષામાં એક કપલ બેઠું અને રિક્ષાવાળાને બસ સ્ટેશન જવા માટે કહ્યું. આ કપલને બસ-સ્ટેન્ડ પર છોડીને રિક્ષાચાલક આગળ નીકળ્યો ત્યારે તેણે જોયું કે તેના રિક્ષામાં એક બેગ પડી છે. આ રિક્ષાચાલકે તે બેગ ખોલી નહીં અને નજીકના એક પોલીસ સ્ટેશનમાં જમા કરાવી દીધી.

પોલીસે જ્યારે આ બેગ ખોલી ત્યારે તેમાંથી 11 તોલા સોનુ અને રૂપિયા 20000ની રોકડ સહિત કુલ 7 લાખ રૂપિયાનો કિંમતી સામાન અને કપડા મળ્યા. બાદમાં જેની આ બેગ હતી તે કપલનો સંપર્ક કરવામાં આવ્યો. આ કપલે પણ તેમની બેગ ગુમ થયા અંગેની પોલીસમાં ફરિયાદ નોંધાવી હતી. પોલીસ સ્ટેશનમાં આ કપલને તેમની બેગ સોંપવામાં આવી, અને રિક્ષાચાલકનું સન્માન કરવામાં આવ્યું કારણકે તેણે આ બેગ પરત કરીને ઈમાનદારીનું ઉદાહરણ પૂરું પાડ્યું છે.

પૂના શહેરમાં રહેતા અને વર્ષોથી રિક્ષા ચલાવતા આ રિક્ષાચાલક ભાડાના મકાનમાં રહે છે. તેમનો દીકરો એક ખાનગી કંપનીમાં કામ કરે છે. રિક્ષાચાલકે કહ્યું કે મારી રીક્ષામાં બેગ ભૂલી ગયેલા કપલની બેગ પરત કરવા બદલ મારી પ્રશંસા થઈ એટલે હું ખુશ છું. મારા જીવનનું આ સૌથી મોટું ઈનામ છે.