નવી દિલ્હી- કોંગ્રેસ નેતા રાહુલ ગાંધી ભારત જોડો યાત્રા દરમિયાન અત્યારે કર્ણાટકમાં છે. આ યાત્રા પાછલા 17 દિવસથી કર્ણાટકમાં છે અને રાજ્યના અલગ અલગ વિસ્તારોમાં પ્રવાસ કરી રહ્યા છે. રાહુલ ગાંધી યાત્રામાં સામેલ થનારા યુવાનો અને પાર્ટીના કાર્યકર્તાઓ સાથે પણ સતત વાતચીત કરી રહ્યા છે. રાહુલ ગાંધી યુવાનો પાસેથી યાત્રાનો અનુભવ સાંભળી રહ્યા છે. સાથે જ પોતાનો અનુભવ પણ શેર કરે છે. આવો જ એક વીડિયો પાર્ટી દ્વારા શેર કરવામાં આવ્યો છે, જેમાં તડકાનો ઉલ્લેખ કરવામાં આવ્યો છે. આ વાતચીત દરમિયાન એક યુવકે રાહુલ ગાંધીને પૂછ્યું કે, તમે કઈ સનસ્ક્રીન વાપરો છો. રાહુલ ગાંધીએ કહ્યું કે, હું કોઈ સનસ્ક્રીન નથી વાપરતો. મારા મમ્મીએ મોકલી છે પણ હું વાપરતો નથી. રાહુલ પોતાની ટીશર્ટની સ્લીવ ઉંચી કરીને પણ બતાવે છે કે તેઓ ટેન થઈ ગયા છે.
આ વાતચીત દરમિયાન રાહુલ ગાંધી મજાકના મૂડમાં જણાઈ રહ્યા હતા. જ્યારે એક યુવકે થાકની વાત કરી તો રાહુલ ગાંધીએ કહ્યું કે જો તમે થાકવા માંગતા હોવ તો આપણે સ્પીડ વધારી શકીએ છીએ. રાહુલ ગાંધીએ જણાવ્યું કે તે યાત્રા સિવાયના સમયમાં કસરત કરે છે. ત્યારપછી મમ્મી, બહેન અને મિત્રોને ફોન કરીને વાતચીત કરે છે. પુસ્તક વાંચે છે. રાહુલ ગાંધી સવારે 6.30 વાગ્યે ચાલવાની શરુઆત કરે છે. તે 11-12 વાગ્યા સુધીમાં બ્રેક લે છે. રાહુલ ગાંધીએ ચાલવાની સ્પીડ બાબતે પણ જણાવ્યું કે, જો ઝડપથી ચાલશે તો તડકો શરુ થાય તે પહેલા નિર્ધારિત સ્થળ પર પહોંચી શકે છે.
આ દરમિયાન જ સનસ્ક્રીનનો ઉલ્લેખ થયો હતો. એક યુવકે પૂછ્યું કે તમારો ચહેરો આટલો ચમકે છે, તમે કઈ સનસ્ક્રીન વાપરો છો? આ સાંભળીને રાહુલ ગાંધીએ જણાવ્યું કે તેઓ કોઈ ક્રીમ નથી વાપરતા. ત્યા હાજર અન્ય લોકોએ પણ કહ્યું કે, તડકામાં ચાલીને ટેનિંગ થઈ ગયું છે. રાહુલ ગાંધીએ કહ્યું કે, સોનિયા ગાંધીએ તેમના માટે ક્રીમ મોકલી છે પણ તે લગાવતા નથી. આ સાંભળીને હાજર લોકો હસી પડ્યા હતા.