રાહુલ ગાંધીએ પહેલા પીએમ મોદીને જન્મદિનની શુભેચ્છા પાઠવી પછી ટોણો માર્યો

નવી દિલ્હીઃ કોંગ્રેસ સાંસદ રાહુલ ગાંધીએ વડાપ્રધાન નરેન્દ્ર મોદીને તેમના 70માં જન્મદિવસ પર દેશ અને દુનિયાના વિવિધ દેશોમાંથી શુભેચ્છાઓનો વરસાદ થઈ રહ્યો છે. આવામાં રાહુલ ગાંધીએ પણ વડાપ્રધાન મોદીને શુભેચ્છા પાઠવી પણ આ પછી તેમણે એક એવો ટોણો માર્યો કે જેના કારણે તેમનું ટ્વીટ વાયરલ થઈ રહ્યું છે. સવારે સવા સાત વાગ્યે રાહુલ ગાંધીએ ટ્વીટ કરીને લખ્યું હતું કે, "વડાપ્રધાન નરેન્દ્ર મોદીને જન્મદિવસની શુભેચ્છાઓ પાઠવું છું." જોકે, આ ટ્વીટ બાદ તેમણે એ બેરોજગારીને અનુલક્ષીને ટ્વીટ કરીને સરકારની નીતિઓ સામે સવાલ ઉઠાવીને ટોંણો માર્યો.

વાયનાડના કોંગ્રેસના સાંસદ રાહુલ ગાંધીએ વડાપ્રધાન નરેન્દ્ર મોદીને જન્મદિવસની શુભેચ્છાઓ પાઠવ્યા બાદ વધુ એક ટ્વીટ કર્યું. આ ટ્વીટમાં તેમણે લખ્યું કે, "ભારે બેરોજગારીના કારણે યુવાનો આજે રાષ્ટ્રીય બેરોજગારી દિવસ મનાવવા માટે મજબૂર છે. રોજગાર સન્માન છે. સરકાર ક્યાં સુધી આ સન્માન આપવાથી પાછળ ખસતી રહેશે?"



રાહુલ ગાંધી સિવાય વડાપ્રધાન મોદીને રાષ્ટ્રપતિ રામનાથ કોવિંદ સહિત તેમના સાથી નેતાઓ અને વિપક્ષના નેતાઓએ પણ જન્મદિવસની શુભેચ્છાઓ પાઠવી છે. ભાજપ દ્વારા વડાપ્રધાન મોદીના જન્મદિવસના સપ્તાહને સેવા સપ્તાહના સ્વરુપમાં ઉજવવામાં આવી રહ્યું છે.

પાર્ટીના નેતાઓ દ્વારા વડાપ્રધાનની નીતિઓની પ્રશંસા કરવામાં આવી રહી છે. જેમાં દેશના સંરક્ષણ મંત્રી રાજનાથ સિંહે લખ્યું કે, વડાપ્રધાન નરેન્દ્ર મોદીને શુભેચ્છાઓ અને શુભકામનાઓ. ભારતને તેમના નેતૃત્વમાં દૃઢ વિશ્વાસ અને નિર્ણાયક કાર્યવાહીથી ઘણો ફાયદો થયો છે. તેઓ ગરીબો અને છેવાડાના લોકોને સશક્ત બનાવવાની દિશામાં ઝડપથી કામ કરી રહ્યા છે. તેમના સારા સ્વાસ્થ્ય અને લાંબા જીવન માટે પ્રાર્થના કરું છું.

કાયદા મંત્રી રવિશંકર પ્રસાદે કહ્યું કે, "સંત સમાન જીવન, દેશની સુરક્ષા, ગરીબોની સેવા અને સંપૂર્ણ પ્રમાણીકતા સાથે દેશના વિકાસના સંકલ્પ સાથે અદમ્ય સાહસ અને સુશાસનનું પ્રામાણિક ઉદાહણ- એવા યશસ્વી વડાપ્રધાન નરેન્દ્ર મોદીને હાર્દિક શુભેચ્છાઓ."