રેલવેના નવા ટાઇમ ટેબલમાં 36 નવી ટ્રેનની જાહેરાત, 350ની વધારાઈ સ્પીડ

ગુલશન રાય ખત્રી, નવી દિલ્હીઃ ભારતીય રેલવે આગામી એક વર્ષમાં 36 નવી ટ્રેન દોડાવવાની તૈયારીમાં છે. તેમાં હમસફર, તેજસ અને ઉદય ટ્રેન પણ સામેલ છે. રેલવે પ્રધાન સુરેશ પ્રભુએ ગુરુવારે રેલવેનું નવું ટાઇમ ટેબલ જાહેર કર્યું હતું. આ ટાઇમ ટેબલ મુજબ રેલવેએ 240 ઓપરેશનલ હોલ્ટને કોમર્શિયલ સ્ટોપેજ આપવાનો પણ નિર્ણય કર્યો છે. જોકે નવી ટ્રેનો શરૂ થવાની તારીખની જાહેરાત કરવામાં આવી નથી.

ભારતીય રેલવેના અધિકારીઓનું કહેવું છે કે, પહેલી ઓક્ટોબરથી લાગુ થનારા આ ટાઇમ ટેબલની ખાસ વાત એ છે કે, રેલવેએ આ વર્ષે મિશન રફતાર અંતર્ગત 350 ટ્રેનની સ્પીડ વધારવાનો નિર્ણય લીધો છે. આ 350 ટ્રેનમાંથી 75 ટ્રેન એવી પણ છે, જેની સ્પીડ વધ્યા બાદ તે સુપરફાસ્ટની કેટેગરીમાં સામેલ થઈ જશે.

રેલવેના નવા ટાઇમટેબલમાં બજેટમાં જાહેર કરાયેલી હમસફર, ઉદય અને તેજસ જેવી ટ્રેનના રૂટ્સની પણ જાહેરાત કરવામાં આવી છે. જે 10 હમસફર ટ્રેનને આગામી એક વર્ષમાં દોડવાશે, તેમાં ગોરખપુરથી આનંદ વિહાર (વાયા લખનઉ), દુર્ગથી નિજામુદ્દીન (વાયા ઝાંસી), બાંદ્રાથી પટના, સિયાલદહથી જમ્મુ તાવી (વાયા લખનઉ અને વારાણસી), શ્રીગંગા નગરથી તિરુચુરલ્લાપલ્લી (વાયા અમદાવાદ) સામેલ છે.

આમ સંપૂર્ણ સ્લીપર ક્લાસ ધરાવતી અંત્યોદન ટ્રેનોના રૂટ છે- દરભંગાથી જલંધર (વાયા ગોરખપુર), તાતાનગરથી લોકનાયક તિળક ટર્મિનસ, બિલાસપુરથી ફિરોઝપુર, બાંદ્રાથી ગોરખપુર વગેરે. એ જ રીતે ત્રણ તેજસ ટ્રેન્સના રૂટ પણ જાહેર કરવામાં આવ્યા છે. તેજસ ટ્રેન્સ નવી દિલ્હી અને ચંડીગઢ, લખનઉ અને આનંદ વિહાર અને મુંબઈ સીએસટીથી મડગાંવ વચ્ચે દોડશે. એ જ રીતે ઉદય ટ્રેનોના પણ ત્રણ નવા રૂટ નક્કી કરવામાં આવ્યા છે.

મહિલા કોટા
રેલવે પ્રધાન સુરેશ પ્રભુએ કેટરિંગ યુનિટમાં મહિલાઓનો કોટા વધારીને 33 ટકા કરવાનો નિર્ણય લીધો છે. રેલવેનું કહેવું છે કે, સ્ટેશન્સ પર ટ્રોલી, સ્ટોલ વગેરે માટે હવે મહિલાઓને પણ 33 ટકા ભાગીદારી મળશે.