કોરોના ટેસ્ટ અંગે રાજસ્થાન સરકારનો નિર્ણય, પ્રાઈવેટ લેબમાં પણ 800 રુપિયામાં થશે તપાસ

જયપુરઃ રાજસ્થાનમાં કોરોના સંક્રમણની તપાસની કિંમતો અશોક ગહેલોત સરકારે શનિવારે 400 રુપિયા ઘટાડીને 800 રુપિયા કર્યા છે. આ પહેલા કોવિડ 19 આરટી-પીસીઆર તપાસ માટે 1200 રુપિયા નક્કી કર્યા હતાં. આ સાથે જ સીએમ અશોક ગહલોતે રાજધાનીમાં 70 બેડવાળા નવા કોવિડ આઈસીયુનું લોકાર્પણ કર્યુ હતું. આ કોવિડ સેન્ટર રાજસ્થાન સ્વાસ્થ્ય વિજ્ઞાન વિશ્વવિદ્યાલય (આરયુએચએસ) હોસ્પિટલમાં સ્થિત છે. ગહલોત 6 જિલ્લામાં આરટીપીસીઆર લેબ અને જોધપુરના મથુરાદાસ માથુર હોસ્પિટલમાં અત્યાધુનિક કેન્સર નિદાન વોર્ડ તથા અન્ય ચિકિત્સા સુવિધાઓના લોકાર્પણ સમારોહને સંબોધન પણ કર્યુ હતું.

મહામારી પર નિયંત્રણ જરુરીઃ અશોક ગેહલોત
આ તકે મુખ્યમંત્રી અશોક ગેહલોતે કહ્યું કે,'કોરોના મહામારી પર નિયંત્રણ માટે જરુરી છે કે તેના સંક્રમણને છુપાવવું ન પડે. કારણકે સારવારમાં જો આ રોગમાં મોડું થાય તો ઘાતક બને છે. જે લોકોએ કોરોના વાયરસનું સંક્રમણ છુપાવવા માટે સમય પર તપાસ અને સારવાર નથી કરાવતા તેને પછીથી ગંભીર થઈને હોસ્પિટલમાં સારવાર કરાવવી પડે છે.'

તપાસ માટે રાજસ્થાનમાં મજબૂત માળખુંઃ CM
મુખ્યમંત્રીએ કહ્યું કે કોરોના સંક્રમિત વ્યક્તિઓની ઓફિશ્યિલ તપાસ અને સામુહીક સારવાર માટે સમગ્ર રાજસ્થાનમાં માળખુ મજબૂત કરવામાં આવ્યું છે. અને દરેક જિલ્લામાં RT-PCR ટેસ્ટ સુવિધા ઉપલબ્ધ છે. ટોંક, પ્રતાપગઢ, રાજસમંદના નાથદ્વારા, જેસલમેર, હનુમાનગઢ અને બૂંદીમાં ટેસ્ટ લેબનું વર્ચ્યુઅલ લોકાર્પણ કરતા તેમણે ખુશી જાહેર કરી હતી. તેમણે સામાન્ય જનતાનો આભાર વ્યક્ત કરતા કહ્યું હતું કે જનતાએ રાજ્ય સરકારનો ભરપૂર સાથ આપ્યો છે. જેથી અમે રાજસ્થાનમાં ઉત્તમ પ્રબંધ કરી શક્યા છીએ.

1200 રુપિયા ઘટાડી 800 રુપિયા નક્કી કર્યો ભાવ
મુખ્યમંત્રીએ કહ્યું કે દેશમાં રાજસ્થાન અને તામિલનાડુ બે જ રાજ્ય છે, જ્યાં કોરોનાની તપાસ માટે 100 % ટેસ્ટ સૌથી વિશ્વસનીય પદ્ધતિ આરટીપીસીઆરથી કરવામાં આવે છે. દરેક જિલ્લાઓમાં નિશુલ્ક સરકારી તપાસ વ્યવસ્થા સાથે જ પ્રાઈવેટ લેબ અને હોસ્પિટલમાં પણ ન્યૂનતમ ભાવે RT-PCR તપાસ વ્યવસ્થા ઉપલબ્ધ કરાવી છે. હવે પ્રાઈવેટ લેબમાં તપાસ કરવાના ભાવ 1200 રુપિયાથી ઘટાડીને 800 રુપિયા કરવામાં આવ્યા છે.