ભારે હોબાળા વચ્ચે રાજ્યસભામાંથી ધ્વનિ મત દ્વારા પાસ કરાયા કૃષિ બીલ

નવી દિલ્હીઃ વિરોધી સાંસદોના ભારે હોબાળા વચ્ચે રાજ્યસભામાંથી ખેતીને લગતા બિલ પાસ કરવામાં આવ્યા છે. કૃષિ ઉપજ વેપાર અને વાણિજ્ય બિલ-2020 કૃષિ કિંમત આશ્વાસન અને કૃષિ સેવા પર કરાર બિલ, 2020 (Farmers' and Produce Trade and Commerce (Promotion and Facilitation) Bill, 2020 and Farmers (Empowerment and Protection) Agreement on Price Assurance and Farm Services Bill, 2020)ને પાસ થઈ ગયા છે. ધ્વનિ મતથી આ બિલ પસાર થતા પહેલા બિલના વિરોધમાં ભારે હોબાળો થયો. સૂત્રોચ્ચાર કરીને સાંસદો વેલ સુધી પહોંચી ગયા. કોવિડ-19ને ભૂલીને ધક્કા-મુક્કી પણ થઈ. વિપક્ષે આને કાળો દિવસ ગણાવ્યો. તૃણમૂલ કોંગ્રેસના સાંસદ ડેરેક ઓ'બ્રાયને કહ્યું કે આ લોકતંત્રની હત્યા છે. આ બિલના વિરોધમાં સંસદની બહાર પણ હરિયાણા સહિતની જગ્યાઓ પર વિરોધ કરવામાં આવી રહ્યા છે.

વિરોધ પક્ષ દ્વારા સૂત્રોચ્ચાર અને હોબાળો

જ્યારે ઉપસભાપતિ હરિવંશે બિલ પર ધ્વનિમતથી મતદાન કરાવવા માટે કહેવાયું તો સાંસદો દ્વારા હોબાળો કરવામાં આવ્યો. આ બિલને સિલેક્ટ કમિટીને મોકલવાના પ્રસ્તાવ પર મતવિભાજન કરવાની માંગ કરાઈ રહી હતી. તૃણમૂલ કોંગ્રેસ અને અન્ય વિપક્ષની પાર્ટીઓના સાંસદો સ્પીકરની નજીક પહોંચી હોબાળો કરવા લાગ્યા હતા, આ પછી માર્શલ દ્વારા હસ્તક્ષેપ કરવાની જરુર પડી, ઉપસભાપતીનું માઈક પણ તોડી નાખવામાં આવ્યું હતું. થોડા સમય માટે ગૃહની કાર્યવાહી રોકવી પડી હતી. ફરી કાર્યવાહી શરુ થતાં પણ ભારે હોબાળો જોવા મળ્યો હતો.

વિરોધ પક્ષે "કાળો દિવસ" ગણાવ્યો

રાજ્યસભામાં હોબાળા વચ્ચે બિલ પાસ થવા પર વિપક્ષના સાંસદોએ તીખી પ્રતિક્રિયા આપી. કોંગ્રેસ પ્રવક્તા રણદીપ સુરજેવાલાએ કહ્યું કે, "બાહુબલી મોદી સરકારે જબરજસ્તી ખેડૂતો બિલ પાસ કરાવ્યું છે. આનાથી વધારે કાળો દિવસ બીજો ના હોઈ શકે. દેશના ખેડૂતો મોદી સરકારને ક્યારેય માફ નહીં કરે." જ્યારે ડેરેક ઓ'બ્રાયને કહ્યું કે, "તેમણે (સરકાર) છેતરપિંડી કરી છે, તેમણે સંસદના દરેક નિયમ તોડ્યા છે. આ ઐતિહાસિક દિવસ હતો, સૌથી ખરાબ દ્રષ્ટીએ." તેમણે રાજ્યસભાની ટીવી ફીટ કાપી નાખી જેથી દેશ જોઈ ના શકે. તેમણે RSTVને સેન્સર કરી દીધું. અમારી પાસે પૂરાવા છે." તેમણે રાજ્યસભામાંથી બહાર નીકળતા જ ટ્વિટર પર વીડિયો પોસ્ટ કર્યો.

ભાજપે વિરોધીઓને "ખેડૂત વિરોધી" ગણાવ્યા

ખેતીને લગતા બિલ પાસ થવા પર ભાજપના અધ્યક્ષ જેપી નડ્ડાએ કહ્યું કે, "નરેન્દ્ર મોદીના નેતૃત્વમાં સરકારે ખેડૂતોને પાછલા 70 વર્ષના અન્યાયથી મુક્તિ અપાવી છે." તેમણે રાજ્યસભાના હોબાળા અંગે કહ્યું, "વિરોધીઓ ખેડૂત વિરોધી છે. પ્રક્રિયાનો ભાગ બનવાના બદલે તેમણે ખેડૂતોની મુક્તિને રોકવાની કોશિશ કરી. ભાજપ તેમની આ વર્તણૂકની નિંદા કરે છે."