ગુજરાત કેડરના IPS રાકેશ અસ્થાનાને BSFના DG બનાવાયા

નવી દિલ્હી: સીબીઆઈના પૂર્વ સ્પેશિયલ ડિરેક્ટર રાકેશ અસ્થાનાને નાર્કોટિક્સ કન્ટ્રોલ બ્યૂરો (NCB)ના ડિરેક્ટર જનરલના વધારાના હવાલાની સાથે સાથે સીમા સુરક્ષા દળ (BSF)ના ડિરેક્ટર જનરલ (DG) બનાવાયા છે. તેઓ હાલમાં નાગરિક ઉડ્ડયન સુરક્ષા બ્યૂરો (BCAS)ના ડિરેક્ટર જનરલ અને નારકોટિક્સ કન્ટ્રોલ બ્યૂરોનો વધારાનો હવાલો સંભાળી રહ્યા હતા. ઉલ્લેખનીય છે કે, અસ્થાનાનું નામ સીબીઆઈ વિરુદ્ધ સીબીઆઈ મામલે ચર્ચામાં આવ્યું હતું.

આ વર્ષે માર્ચમાં કોર્ટે તપાસ એજન્સીની એ રિપોર્ટને સ્વીકારી લીધી હતી, જેમાં તેણે સીબીઆઈના પૂર્વ સ્પેશિયલ ડિરેક્ટર રાકેશ અસ્થાના અને ડેપ્યુટી પોલીસ સુપ્રિટેન્ડન્ટ (DSP) દેવેન્દ્ર કુમારને ક્લિન ચિટ આપી હતી. તપાસ એજન્સી સીબીઆઈએ પોતાના રિપોર્ટમાં કહ્યું હતું કે, અસ્થાના અને દેવેન્દ્ર કુમારની સામે તેમને પૂરતી સામગ્રી મળી નથી.