દિલ્હીમાં કોરોનાનો કહેરઃ છેલ્લા 24 કલાકમાં નોંધાયા રેકોર્ડ 6,842 નવા કેસ

દિલ્હીમાં કોરોના વાયરસે અત્યાર સુધીનો રેકોર્ડ તોડી દીધો છે. બુધવારે સતત બીજા દિવસે દિલ્હીમાં કોરોના વાયરસના 6,000થી વધુ કેસો નોંધાયા છે. દિલ્હીમાં કોરોના વાયરસનો ચેપ ઝડપથી ફેલાઈ રહ્યો છે.

બુધવારે સમાપ્ત થયેલા 24 કલાકમાં દિલ્હીમાં કોવિડ-19ના કુલ 6,842 નવા કેસ સામે આવ્યા છે. જે અત્યાર સુધી એક દિવસમાં નોંધાયેલા સૌથી વધારે કેસ છે. આ સાથે જ દિલ્હીમાં ચેપગ્રસ્તોની સંખ્યા વધીને 4,09,938 પર પહોંચી ગઈ છે. છેલ્લા 24 કલાકમાં કોરોનાથી 51 લોકોના મોત થયા છે અને મૃત્યુઆંક 6,703 થઈ ગયો છે.

બુધવારે સમાપ્ત થયેલા 24 કલાકમાં દિલ્હીમાં 5,797 દર્દીઓ સાજા થયા છે. દેશની રાજધાનીમાં અત્યાર સુધી કુલ 3,65,866 લોકો કોવિડ-19ના ચેપમાંથી મુક્ત થયા છે. દિલ્હીમાં આ 24 કલાક દરમિયાન 58,910 લોકોને ટેસ્ટ કરવામાં આવ્યો હતો.

દિલ્હીમાં હવે કોરોના વાયરસના સંક્રમણનો દર 11.61 ટકા અને રિકવરી રેટ 89.24 ટકા છે. સક્રિય દર્દીઓની સંખ્યા 9.11 ટકા જ્યારે ડેથ રેટ 1.64 ટકા છે. સક્રિય દર્દીઓની સંખ્યા 37,369 છે. દિલ્હીમાં 22,248 દર્દીઓ હોમ આઈસોલેશનમાં છે. કન્ટેનમેન્ટ ઝોનની સંખ્યા 3596 છે. અત્યાર સુધી કુલ 48,80,433 ટેસ્ટ થયા છે.