આસિ. પ્રોફેસરનો મૃતદેહ કારમાંથી મળ્યો, પતિના મોતના સમાચાર સાંભળીને પત્નીએ પુત્રી સાથે કરી આત્મહત્યા

રોહતકઃ રોહતક હેલ્થ યુનિવર્સિટીની કોલેજ ઓફ નર્સિંગના આસિસ્ટંટ પ્રોફેસર દ્વારા કથિત રીતે આત્મહત્યા કર્યાના થોડા કલાકો બાદ ગુરુવારે રોહતક-સોનીપત રોડ પર પાણીની ટાંકીમાંથી તેમની પત્ની અને પુત્રીના મૃતદેહ પણ મળી આવ્યા છે.

મળી રહેલી માહિતી મુજબ આસિસ્ટન્ટ પ્રોફેસર ડો. પ્રમોદ સહારન (35) રાજસ્થાનના રાજગઢના રહેવાસી હતા અને તેમના લગ્ન ચરખી-દાદરીના મીનાક્ષી સંગવાન (33) સાથે થયાં હતાં. મીનાક્ષી કહાનૌર ગામની એક સરકારી શાળામાં બાયોલોજીના લેક્ચરર હતાં.

પોલીસે જણાવ્યું હતું કે પ્રમોદ બુધવારે ગુરુગ્રામ ગયા હતા અને તેમનો મૃતદેહ કથિત રૂપે ઝ્જજર-રોહતક રોડ પર કન્હેલી ગામ નજીક તેમની કારમાં મળી આવી હતી. પોલીસને કારની અંદરથી જંતુનાશક પદાર્થોનું ખાલી પાઉચ અને એક સ્યુસાઇડ નોટ મળી આવી, જેમાં તેઓએ આત્મહત્યા કરવાનું કારણ જણાવ્યું નથી તેમજ તેમના આ પગલા માટે કોઈને જવાબદાર પણ નથી ગણાવ્યા.

પ્રમોદના મોતની જાણ થતાં જ મીનાક્ષી તેની બે પુત્રી સાથે રોહતકના સેક્ટર -2 માં પોતાનું ઘર છોડી દીધું અને કથિત રીતે પુત્રીઓને પાણીની ટાંકીમાં ધકેલીને આત્મહત્યા કરી લીધી, પરંતુ તેની 11 વર્ષની પુત્રી ત્યાંથી ભાગવામાં સફળ રહી હતી અને સ્થાનિકોને આ ઘટના અંગે જણાવ્યું હતું. આ અંગેની માહિતી મળતાં પોલીસ ઘટના સ્થળે પહોંચી શોધખોળ શરૂ કરી અને ટાંકીમાંથી માતા અને પુત્રીના મૃતદેહ બહાર કાઢવામાં આવ્યા છે.

રોહતક અર્બન એસ્ટેટ પોલીસ સ્ટેશનના ઇન્ચાર્જ શમશેરસિંહે જણાવ્યું હતું કે ગુરુવારે રોહતકના સેક્ટર -૨ માં પાણીની ટાંકીમાંથી મહિલા અને તેની પુત્રીની લાશ મળી આવી હતી. SHOએ જણાવ્યું હતું કે પ્રાથમિક તપાસમાં એવું લાગે છે કે મહિલાએ તેની પુત્રીઓ સાથે આત્મહત્યા કરવાનો પ્રયાસ કર્યો હતો કારણ કે તેણીના પતિના મૃત્યુના સમાચાર સાંભળીને તે આઘાતમાં આવી ગઈ હતી. તેમણે જણાવ્યું હતું કે લાશને પોસ્ટમોર્ટમ માટે મોકલી દેવામાં આવી છે અને પોલીસ કેસની તપાસ કરી રહી છે.