દેશની સેવા કરવા માટે પુત્ર બાદ પિતા પણ કોવેક્સીનની હ્યુમન ટ્રાયલમાં જોડાયા

કોવેક્સીન રસી હૈદરાબાદની ભારત બાયોટેક દ્વારા તૈયાર કરવામાં આવી છે. ભારત બાયોટેકે નેશનલ ઈન્સ્ટિટ્યુટ ઓફ વાયરોલોજી (એનઆઈવી) અને ઈન્ડિયન કાઉન્સિલ ઓફ મેડિકલ રિસર્ચ (આઈસીએમઆર) સાથે મળીને આ વેક્સીન તૈયાર કરી છે. તેના બીજા ફેઝમાં દેશભરમાં 325 લોકોને કોવેક્સીન આપવામાં આવશે તે કેટલી અસરકારક છે તેના પરીણામો જોવા માટે તેનો અભ્યાસ કરવામાં આવશે.

રોહતકમાં 17 જૂલાઈએ ત્રણ લોકોને કોવેક્સીન આપવામાં આવી હતી જેમાં 26 વર્ષીય યુવક પણ સામેલ હતો. તેમનામાં આની કોઈ અવળી અસર ન જોવા મળ્યા બાદ ગત સપ્તાહે રોહતકમાં બીજા તબક્કાને મંજૂરી આપવામાં આવી હતી. આ વ્યક્તિએ અખબારમાં હ્યુમન ટ્રાયલ અંગે વાંચ્યા બાદ પીજીઆઈએમએસનો સંપર્ક કર્યો હતો. રોહતક નજીક રહેતા અને બીટેકની ડિગ્રી ધરાવતા 26 વર્ષીય યુવકે જણાવ્યું હતું કે હું આર્મીમાં જોડાવા ઈચ્છતો હતો પરંતુ તેમ થઈ શક્યું નહીં. તેથી જ્યારે મેં કોરોના વાયરસની રસીની હ્યુમન ટ્રાયલ અંગે વાંચ્યું ત્યારે મને મારે દેશ માટે કંઈ કરવાની તક મળી.

વેક્સીનની હ્યુમન ટ્રાયલ સમાપ્ત ન થાય ત્યાં સુધી પોતાની ઓળખ જાહેર ન કરવાની વિનંતી સાથે યુવકે કહ્યું હતું કે તે રક્તદાન કરતા પરિવારમાંથી આવે છે અને તેને નાનપણથી જ સમાજસેવાના ગુણો મળ્યા છે. તેણે કહ્યું હતું કે મારા પિતાએ 84 વખત રક્તદાન કર્યું છે અને મેં 27 વખત રક્તદાન કર્યું છે. મારી માતાએ પણ રક્તદાન કર્યું છે. અમે નિયમિત રીતે રક્તદાન કરીએ છીએ અને તે માટે કેમ્પનું આયોજન પણ કરીએ છીએ. અમે અમારા મોટા ભાઈના લગ્ન દરમિયાન પણ રક્તદાન કેમ્પ યોજ્યો હતો.

પોતે હ્યુમન ટ્રાયલમાં જોડાવાનો છે તેની જાણ થતાં તેના પરિવારની પ્રતિક્રિયા શું હતી તે અંગે પૂછતા તેણે કહ્યું હતું કે, તેના પિતાએ તેને આશિર્વાદ આપ્યા હતા અને કહ્યું હતું કે વિલંબ કર્યા વગર તેમાં જોડાઈ જા. તેણે કહ્યું હતું કે, ગુરૂવારે મારા પિતા પણ જોડાયા હતા. હું 31 જૂલાઈએ પીજીઆઈએમએસ ખાતે મારી વેક્સીનનો બીજો ડોઝ લઈશ.

કોવિડ-19 માટે હરિયાણાના નોડલ ઓફિસર ડોક્ટર ધ્રુવ ચૌધરીએ જણાવ્યું હતું કે આ ઘણી પ્રેરણાદાયક વાત છે કે પિતા અને પુત્ર દેશ અને સમાજ માટે કંઈ કરવા માટે હ્યુમન ટ્રાયલ્સમાં જોડાયા છે. હ્યુમન ટ્રાયલ્સમાં પ્રત્યેક વ્યક્તિ જોડાઈ શકતો નથી. જે લોકો સ્વૈચ્છિક રીતે તેમાં જોડાવા ઈચ્છતા હોય તેમનો બ્લડ અને યુરિન ટેસ્ટ કરવામાં આવે છે. જો તેઓ શારીરિક અને માનસિક રીતે ફિટ જણાય તો જ તેમને હ્યુમન ટ્રાયલ્સમાં ભાગ લેવા મળે છે. તેમની ઉંમર પણ 18થી 55 વર્ષની વચ્ચે હોવી જરૂરી છે.