1 સપ્ટેમ્બર પછી નવા વાહનની સાથે 3 થી 5 વર્ષનો વીમો પણ ફરજિયાત લેવો પડશે

I am Gujarat

સુપ્રીમ કોર્ટે આપ્યો આદેશ

નવી દિલ્હી: 1 સપ્ટેમ્બર 2018થી નવું વાહન ખરીદનારાને ફરજિયાતપણે ત્રણથી પાંચ વર્ષ સુધીનો થર્ડ-પાર્ટી વીમો પણ લેવો પડશે. સુપ્રીમ કોર્ટે આદેશ આપ્યો છે કે, 1 સપ્ટેમ્બર પછી ત્રણ કે પાંચ વર્ષના લાંબા ગાળાના ઈન્શ્યોરન્સ વિના કોઈપણ વાહનનું વેચાણ ન થવું જોઈએ. અત્યાર સુધી વાહનની સાથે એક વર્ષનો વીમો આવે છે. જોકે, કોર્ટે તેને ત્રણ કે પાંચ વર્ષનો કરવા કહ્યું છે.

માત્ર થર્ડ પાર્ટી વીમાનું પ્રીમિયમ નીચું હોય છે

હાલ થર્ડ પાર્ટી વીમો દર વર્ષે રિન્યૂ કરાવવાનો રહે છે. થર્ડ પાર્ટી વીમા વગર વાહન ચલાવવું ગુનો બને છે. કોર્ટે થર્ડ પાર્ટી વીમો જ ફરજિયાતપણે લેવા કહ્યું છે, તેવામાં વાહન માલિકો વીમા સાથે આવતા અન્ય ઓપ્શનને દર વર્ષે રિન્યૂ કરાવી શકશે. થર્ડ પાર્ટી વીમાની કિંમત ખાસ નથી હોતી, પરંતુ જો ફોર વ્હીલરનો તેની સાથે એન્જિન કવર, વ્હીકલ ઈન્શ્યોરન્સ, ડ્રાઈવર-પેસેન્જર ઈન્શ્યોરન્સ જેવા અનેક ઓપ્શન આવે છે, જેનાથી તેનું પ્રીમિયમ વધી જાય છે.

મોટાભાગના લોકો વીમો રિન્યૂ નથી કરાવતા

સુપ્રીમ કોર્ટ દ્વારા રોડ સેફ્ટી મામલે નિમાયેલી સમિતિની ભલામણો સ્વીકારતા જસ્ટિસ મદન બી લોકુર અને દીપક ગુપ્તાની બેંચે જણાવ્યું હતું કે, વાહન સાથે જે 1 વર્ષનો ફરજિયાત વીમો આવે છે તે પૂરો થઈ ગયા બાદ મોટાભાગના લોકો તેને રિન્યૂ નથી કરાવતા. જેના કારણે અકસ્માતનો ભોગ બનેલા લોકોને વળતર પણ મળી શકતું નથી.

ઈરડાને પોલિસી બનાવવા જણાવાયું

અમારા સાથી અખબાર ટાઈમ્સ ઓફ ઈન્ડિયાએ 2 એપ્રિલે જ જણાવ્યું હતું કે, સુપ્રીમે નિમેલી કમિટિએ ઈરડાને એક વર્ષથી લાંબા ગાળાની ઈન્શ્યોરન્સ પોલિસી પર કામ કરવા માટે કહ્યું છે. ઈરાડએ જ પોતાના એક રિપોર્ટમાં જણાવ્યું હતું કે, 60 ટકા વાહનમાલિકો 1 વર્ષ બાદ વીમો રિન્યૂ નથી કરાવતા.

18 કરોડમાંથી 6 કરોડ વાહનોનો જ વીમો

આ કેસમાં અદાલત મિત્ર બનેલા એડવોકેટ ગૌરવ અગ્રવાલે કોર્ટને જણાવ્યું હતું કે, ગાડી સાથે ત્રણ વર્ષ, અને ટુ વ્હીલર સાથે 5 વર્ષનો થર્ડ પાર્ટી વીમો ફરજિયાત હોવો જોઈએ. વાહનના વેચાણ સાથે જ આ વીમો પણ ગ્રાહકે ખરીદવો જરુરી બનાવવો જોઈએ. તેમણે જણાવ્યું હતું કે, ભારતમાં 18 કરોડ જેટલા રજિસ્ટર્ડ વાહનો છે, જેમાંથી માત્ર છ કરોડ જ થર્ડ પાર્ટી વીમો ધરાવે છે.