વડાપ્રધાન નરેન્દ્ર મોદી માટે અમેરિકાથી આવી રહ્યું છે બીજું 'સ્પેશિયલ પ્લેન'

નવી દિલ્હી: વડાપ્રધાન નરેન્દ્ર મોદી માટે મગાવવામાં આવેલું બીજું સ્પેશિયલ પ્લેન આજે દિલ્હી પહોંચશે. વડાપ્રધાનની સાથે-સાથે રાષ્ટ્રપતિને દેશ-વિદેશની યાત્રા દરમિયાન હવે વધારે સુરક્ષા મળશે. ભારતના રાષ્ટ્રપતિ, ઉપરાષ્ટ્રપતિ અને વડાપ્રધાનની મુસાફરી માટે તૈયાર બોઈંગ 777 એરક્રાફ્ટનું બીજું સ્પેશિયલ પ્લેન આજે અમેરિકાથી ભારત આવી રહ્યું છે. આ વીઆઈપી પ્લેન આજે અમેરિકાથી ઉપડ્યું છે અને દિલ્હી પહોંચશે. આ પહેલા પણ એક સ્પેશિયલ પ્લેન ઓક્ટોબરમાં ભારત આવ્યું હતું.

વીવીઆઈપીની યાત્રા દરમિયાન આ બંને બી 777 પ્લેનને એર ઈન્ડિયાના પાઈલટ નહીં પણ ઈન્ડિયન એરફોર્સના પાઈલડ ઉડાવશે. હાલમાં રાષ્ટ્રપતિ, ઉપરાષ્ટ્રપતિ અને વડાપ્રધાન એર ઈન્ડિયાના બી 747 વિમાનમાં યાત્રા કરે છે. અહીં નોંધનીય છે કે રાષ્ટ્રપતિ, ઉપરાષ્ટ્રપતિ અને વડાપ્રધાનની યાત્રા માટે વિશેષરૂપે તૈયાર કરવામાં આવેલા બી 777 પ્લેનને તારીખ 1 ઓક્ટોબરે અમેરિકાથી ભારત લાવવામાં આવ્યું હતું.

આ પ્લેનની ખાસિયત પણ જાણવા જેવી છે. બી 777 વિમાનોમાં આધુનિક મિસાઈલ રક્ષા સિસ્ટમ હશે જેને લાર્જ એરક્રાફ્ટ ઈન્ફ્રારેડ કાઉન્ટરમેજર્સ અને સેલ્ફ પ્રોટેક્શન સૂટ્સ તરીકે ઓળખવામાં આવે છે. ફેબ્રુઆરીમાં અમેરિકાએ ભારતને આ બંને રક્ષા સિસ્ટમ વેચવા માટેની સહમતિ આપી હતી. બંને વિમાનોમાં સુરક્ષાના એવા ઉપકરણ લગાવવામાં આવી રહ્યા છે જેમાં મોટામાં મોટા હુમલા પણ અસર કરતા નથી. અહીં સુધી કે આ વિમાન પર મિસાઈલ હુમલાની પણ કોઈ અસર થશે નહીં અને તે કાઉન્ટર કરવામાં પણ સક્ષમ હશે. હાલ રાષ્ટ્રપતિ, ઉપરાષ્ટ્રપતિ અને વડાપ્રધાન એર ઈન્ડિયાના બી 747 વિમાનમાં યાત્રા કરે છે કે જેના પર એર ઈન્ડિયા વનનું ચિહ્ન હોય છે.