ચીન પર નજર રાખવા માટે ભારતીય સૈન્યને જોઈએ છે ત્રીજુ નેત્ર!

એલએસી પર ચીનની સેનાની આક્રમક તૈનાતીના કારણે આ સેટેલાઈટની જરૂર ઊભી થઈ છે. ચીને શિનજિયાંગ વિસ્તારમાં સૈન્ય અભ્યાસના નામે એલએસીમાં તેની બાજુ 40 હજારથી વધારે સૈનિકો તૈનાત કર્યા છે. આ ઉપરાંત ભારે હથિયારો અને તોપો, ટેન્કો સાથે તે સૈનિકોને એલએસી તરફ આગળ વધારવાનું શરૂ કર્યું છે અને ભારતના ઘણા વિસ્તારોમાં દબાણ કરી લીધું છે. તેના આ પગલાથી લેહ સ્થિત ભારતીય સેનાની 14મી કોરની ઓફિસ પણ આઘાત પામી છે.

ડિફેન્સ સૂત્રોએ જણાવ્યું છે કે ચીનની સેનાની ભારતીય સરહદ નજીકની ગતિવિધિઓ પર નજર રાખવા માટે ચારથી છ ડેડિકેટેડ સેટેલાઈટની જરૂર છે. આ ચારથી છ ડેડિકેટેડ સેટેલાઈટની જરૂર છે જે ઘણા હાઈ-રિઝોલ્યુશન વાળા સેન્સર અને કેમેરાથી સજ્જ હોય જેથી કરીને નાની નાની બાબતો અને લોકોની પ્રવૃત્તિ પર પણ નજર રાખી શકે.

સૂત્રોએ કહ્યું છે કે આનાથી ચીન અને અન્ય દુશ્મન દેશો પર નજર રાખવા માટે આપણી વિદેશી સહયોગીઓની નિર્ભરતા પર પણ ઓછી થશે. ઈન્ડિયન આર્મ્ડ ફોર્સિસ પાસે હાલમાં કેટલાક મિલિટરી સેટેલાઈટ છે જેનો ઉપયોગ દુશ્મનોની ગતિવિધિઓ પર નજર રાખવા માટે કરવામાં આવે છે. જોકે, સૂત્રોનું કહેવું છે કે તેની ક્ષમતાને હજી વધારવાની જરૂર છે.

હાલમાં ચીનના સૈનિકો પેંગોંગ ત્સો લેકની નજીક ફિંગર એરિયામાં ભારતીય વિસ્તારોમાં ઘૂસી ગઈ છે અને ત્યાંથી હટવાની ના પાડી રહી છે. ચીની સેના ફિંગર-5 પર ઓબ્ઝર્વેશન પોસ્ટ બનાવવા ઈચ્છે છે. ગોગરા વિસ્તારમાં પણ તેમણે ઘૂસણખોરી કરી છે.