ફક્ત 225 રૂપિયામાં ઉપલબ્ધ બનશે વેક્સીન
સીરમ ઈન્સ્ટિટ્યુટ ઓફ ઈન્ડિયાએ ભારતમાં કોરોનાની વેક્સીન બનાવવા માટે લંડનની ઓક્સફોર્ડ યુનિવર્સિટી સાથે જોડાણ કર્યું છે. ઓક્સફોર્ડ કોરોનાની વેક્સીન બનાવી રહ્યું છે અને અત્યાર સુધી તેની ટ્રાયલમાં સારા પરિણામ મળ્યા છે. સીરમે શુક્રવારે આ વેક્સીનની કિંમત કેટલી હશે તે જાહેર કર્યું છે. સીરમના જણાવ્યા પ્રમાણે ઓછી કે મધ્યમ આવક ધરાવતા દેશોમાં આ વેક્સીનની કિંમત 3 ડોલર એટલે કે અંદાજીત 225 રૂપિયા રહેશે.
સીરમને વધારે ડોઝ તૈયાર કરવામાં મદદ મળશે
સીરમે ગાવિ અને ધ બિલ એન્ડ મેલિન્ડા ગેટ્સ ફાઉન્ડેશન સાથે જોડાણ કર્યું છે. સીરમનું કહેવું છે કે આ જોડાણથી તેમની કોરોનાની વેક્સીનના ડોઝ બનાવવાની ક્ષમતા વધી જશે અને તે વધારે વેક્સીનનું ઝડપથી ઉત્પાદન કરી શકશે. કંપની ભારતની સાથે સાથે ઓછી તથા મધ્યમ આવક ધરાવતા દેશો માટે પણ વૈક્સીન તૈાર કરશે.
1,125 કરોડ રૂપિયાનું ફંડ આપશે ગેટ્સ ફાઉન્ડેશન
આ જોડાણ બાદ ગેટ્સ ફાઉન્ડેશન ગાવિને 15 કરોડ ડોલર એટલે કે અંદાજીત 1,125 કરોડ રૂપિયાનું રિસ્ક ફંડિંગ કરશે. એટલે કે જો વેક્સીન અંતિમ ટ્રાયલમાં નિષ્ફળ રહેશે તો ત્યાં સુધી બનેલી વેક્સીનનો ખર્ચો ગાવિ ઉઠાવશે. એટલે કે જો વેક્સીન બની ગઈ પરંતુ તે નિષ્ફળ રહી તો તેનો ખર્ચ કંપનીને ઉઠાવવો પડશે નહીં. રિસ્ક ફંડિંગ અંતર્ગત ગાવિ તે ખર્ચ ઉઠાવશે.