એપશહેર

સળગતું ટાયર ફેંકાતા ગંભીર રીતે દાઝેલા હાથીનું મોત, ભયાનક ઘટનાનો વિડીયો વાયરલ

મૃતક હાથી ગામમાં અવારનવાર આવતો પરંતુ કોઈને ક્યારેય નુક્સાન નહોતો કરતો, તેની કડક ચાલને કારણે ગામના લોકો તેને PSI કહીને બોલાવતા હતા

I am Gujarat 23 Jan 2021, 1:13 pm
ચેન્નૈ: થોડા મહિના પહેલા એક ગર્ભવતી હાથણીને ફટાકડા ખવડાવાઈ દેવાયાની ઘટનાએ આખા દેશમાં ચકચાર મચાવી હતી, ત્યારે આવી જ એક બીજી ઘટના તમિલનાડુમાં સામે આવી છે જ્યાં હાથી પર સળગતું ટાયર ફેંકવામાં આવ્યા બાદ ગંભીર રીતે દાઝેલા હાથીનું મોત થયું છે. પોલીસે આ મામલે બે લોકોની ધરપકડ કરી છે. આ ઘટના 8 જાન્યુઆરીના રોજ બની હતી.
I am Gujarat elephant
પ્રતિકાત્મક તસવીર


હાથીએ એક લક્ઝુરિયસ ગાડીને નુક્સાન પહોંચાડતા ઉશ્કેરાયેલા વ્યક્તિએ હાથી પર દાઝ કાઢતા તેના પર સળગતું ટાયર ફેંકી દીધું હતું. આ ઘટનાનો વિડીયો પણ વાયરલ થયો છે, જે તેને જોતા જ રુંવાડા ઉભા થઈ જાય તેટલો ખતરનાક છે. આ વિડીયોમાં હાથી પર સળગતું ટાયર ફેંકાયા બાદ ડરેલો હાથી ભાગતો દેખાય છે. ઉલ્લેખનીય છે કે, જે હાથી પર આ હિચકારો હુમલો કરાયો તેને પીઠમાં પહેલાથી જ ગંભીર ઈજા થયેલી હતી અને જંગલ ખાતા દ્વારા તેની સારવાર કરવામાં આવી રહી હતી.

આ ઘટનામાં ધરપકડ કરાયેલા બે શખ્સોની ઓળખ રેમન્ડ મલ્લન મેલકમ અને પ્રશાંત સુગમરન તરીકે કરવામાં આવી છે. સ્થાનિકોના જણાવ્યા અનુસાર, મેલ્કમ અહીં એક રિસોર્ટ ચલાવે છે, અને હાથીએ રિસોર્ટની નજીક આવીને એક ગાડીમાં તોડફોડ કરી હતી. અહીં હાથી અવારનવાર આવતા રહે છે. આ ઘટના બાદ નિલગીરી જિલ્લાના કલેક્ટરે આ રિસોર્ટને સીલ મારી દેવાનો ઓર્ડર આપ્યો છે.

પ્રાપ્ત માહિતી અનુસાર, હાથીની છેલ્લા દોઢ મહિનાથી તેની પીઠમાં થયેલી ઈજાને કારણે સારવાર ચાલી રહી હતી. તેના પર 08 જાન્યુઆરીએ સળગતું ટાયર ફેંકવામાં આવ્યું તેના કારણે હાથી ગંભીર રીતે દાઝી ગયો હતો, અને લાંબી સારવાર બાદ આખરે 19 જાન્યુઆરીએ તેનું મોત થયું હતું. તમિલનાડુના મુદુમલાઈ પ્રાંતમાં હાથીઓ પર હુમલા કરવાની આ પ્રકારની ઘટના દિવસેને દિવસે વધી રહી છે.

મૃતક હાથીની સંભાળ રાખતા એક વ્યક્તિના જણાવ્યા અનુસાર, આ હાથીનું ગામના લોકોએ PSI નામ પાડ્યું હતું, કારણકે તેની ચાલ પોલીસ જેવી કડક હતી. તે અવારનવાર ગામમાં આવતો પરંતુ તેણે ક્યારેય કોઈને નુક્સાન નથી પહોંચાડ્યું. એક રાતે તે ખોરાકની શોધમાં રિસોર્ટ પાસે પહોંચી ગયો હતો, અને ત્યાંના લોકોએ તેની સાથે ખૂબ જ ખરાબ વર્તન કરી તેના પર સળગતું ટાયર ફેંકી દીધું હતું.

(આ ઘટનાના વિડીયો તેમજ તસવીર વિચલિત કરે તેવા હોવાથી તેને પ્રસિદ્ધ કરવામાં નથી આવ્યા)

Read Next Story

Gujarati News - I am Gujarat: ગુજરાત, દેશ, વિદેશ, શિક્ષણ, બિઝનેસ, મૂવી, જ્યોતિષ, ધર્મ, સ્પોર્ટ્સના લેટેસ્ટ સમાચાર ઉપરાંત વાયરલ ન્યૂઝ મેળવવા માટે ડાઉનલોડ કરો IamGujaratની એપ
તમામ તાજી ખબરો માટે I am Gujarat ફેસબૂકપેજને લાઈક કરો