નવા શૂટરને ગેંગમાં કર્યા હતા સામેલ
ઉમેશ પાલ હત્યાકાંડ માટે એક નવા શૂટર વિજય ચૌધરી ઉર્ફે ઉસ્માનને ગેંગમાં સામેલ કરાયો હતો. અતીક અને અશરફ ગમે તે સ્થિતિમાં ઉમેશની હત્યા કરવા માગતા હતા. આ માટે તેમણે એડીચોટીનું જોર લગાવ્યું હતું. તેવામાં ઉસ્માનને ગેંગમાં સામેલ કરી તેને ઉમેશ પાલ પર સામેથી હુમલો કરવા માટે તૈયાર કરાયો હતો. બેકઅપ ટીમમાં મહોમ્મદ ગુલાબ, સાબિર, ગુડ્ડુ મુસ્લિમ અને અરબાઝ જેવા શૂટર હતા. ગુડ્ડુને વિસ્તારમાં ભયનો માહોલ ઉભો કરવા માટે બોમ્બથી હુમલો કરવાનું કાર્ય સોંપ્યું હતું. વિજય ચૌધરીએ સામેથી ઉમેશ પર હુમલો કર્યો હતો, પરંતુ તે ડગમગી ગયો હતો. જે બાદ અસદના નેતૃત્વમાં બેકઅપ ટીમે પાછળથી હુમલો કરી ઉમેશ પાલ અને તેના બે સરકારી ગનરની હત્યા કરી હતી. આ દરમિયાન ગુડ્ડુ સતત બોમ્બ વરસાવતો રહ્યો હતો, જેથી કોઈ તેને ઘેરવાનો પ્રયાસ કરે નહીં. હત્યાકાંડને અંજામ આપ્યા બાદ તમામ શૂટર ફરાર થઈ ગયા હતા.
કોઈ પણ ભોગે કરવા માગતો હતો અતીકની હત્યા
માફિતા અતીક કોઈ પણ કિંમતે ઉમેશ પાલની હત્યા કરવા માગતો હતો. 2012માં યુપીના ગૃહમંત્રીને લખેલો પત્ર આ સમયે ચર્ચામાં છે. જેમાં અતીકે ઉમેશ પાલના કારણે પોતાની છબીને નુકસાન પહોંચ્યું હોવાની વાત કરી હતી. જો કે, 2018માં અતીક કાયકાદીય દાવપેચમાં ફસાયો હતો. ગુજરાતની સાબરમતી જેલમાં તે બંધ હતો. તો અશરફને બરેલીની જેલમાં રાખવામાં આવ્યો હતો. માફિયા બંધુઓ અને અતીકના બે દીકરા ઉમર તેમજ અલી જેલમાં હોવાથી શાઈસ્તાને ઉમેશની હત્યાનું ષડયંત્ર રચવાનું કામ સોંપાયું હતું. સાબરમતી જેલમાં અતીકથી મુલાકાતના ક્રમમાં ઉમેશની હત્યાનું પ્લાનિંગ થયું હતું. જે બાદ પૈસાની વ્યવસ્થા માટે બિલ્ડર મહોમ્મદ મુસ્લિમને ધમકાવવામાં આવ્યો હતો. તેની પાસેથી 5 લાખની ખંડણી માગી હતી. અતીકે જેલથી મહોમ્મદ મુસ્લિમને વોટ્સએપ પર મેસેજ મોકલ્યો હતો. ખંડણીની જવાબદારી અસદ પાસે હતી. મહોમ્મદ પાસેથી 80 લાખ લીધા હતા.
શાઈસ્તાએ આપી હતી પૈસાની માહિતી
શાઈસ્તા પરવીન અંગે મળેલી જાણકારી પ્રમાણે, તેણે હવાલાથી પૈસાનો ફોટો ક્લિક કરી અતીકને મોકલ્યો હતો. મોબાઈલની તપાસ કરતાં આ અંગે ખુલાસો થયો હતો. હત્યાકાંડ પહેલા 13 જાન્યુઆરીએ શાઈસ્તા પાસે 20 લાખ રૂપિયા આવ્યા હતા. હવાલા દ્વારા પૈસા તેની પાસે પહોંચ્યા હતા.
શાઈસ્તા પરવીન પોલીસ પકડથી દૂર
ઉમેશ પાલ હત્યાકાંડ બાદથી શાઈસ્તા પરવીન નાસતી ફરી રહી છે. તેને શોધવા માટે પોલીસ ત્યાંના સૂમસાન વિસ્તારમાં આવેલા એક-એક ઘરમાં તપાસ કરી રહી છે તેમજ ડ્રોન પરથી પણ નજર રાખવામાં આવી રહી છે. જો કે, આ દરેક પ્રયાસો અત્યારસુધીમાં નિષ્ફળ ગયા છે. એસટીએફ અને યુપી પોલીસને મળેલી જાણકારી પ્રમાણે શાઈસ્તા રિયલ એસ્ટેટની વેપારી છે. તેણે ઘણી બેનામી સંપત્તિને પોતાના નામે કરાવી છે. કેટલીક સંપત્તિ સગા-સંબંધીને નામે પણ કરી છે. બીજી તરફ મીડિયા રિપોર્ટ્સ પ્રમાણે, શાઈસ્તા પતિ અતીકની સંપત્તિ અને કંપનીઓ પોતાના નામે કરી રહી છે. એસટીએફને દિલ્હી, યુપી અને મુંબઈ સહિત ઘણી જગ્યા પર સંપત્તિ પોતાના નામ પર કરવાની જાણકારી મળી છે. આ કામ કરવામાં તે એકલી નથી. ચાર્ટર્ડ એકાઉન્ટન્ટ સહિત ઘણા લોકો ઘણી બેનમ પ્રોપર્ટી મેળવવામાં મદદ કરી રહ્યા છે.