નવી દિલ્હી: એક્ટર સુશાંત સિંહની આત્મહત્યા પછી ઊભા થયેલા વિવાદમાંથી બોલિવુડ હજુ બહાર આવ્યું નથી, ત્યાં તેનાથી પણ મોટો વિવાદ ઊભો થાય તેવો દાવો ભાજપના એક નેતાએ કર્યો છે. ભાજપના રાષ્ટ્રીય ઉપાધ્યક્ષ અને પ્રવક્તા બૈજયંત ‘જય’ પાંડાએ બુધવારે ચોંકાવનારો દાવો કરતા કહ્યું કે, બોલિવુડની ઘણા સ્ટાર્સ પાકિસ્તાની હેન્ડલરોના સંપર્કમાં છે. તેમણે ટ્વીટ કરી કેટલાક બોલિવુડ સ્ટાર્સની કેટલાક એવા પાકિસ્તાની અને એનઆરઆઈ સાથે લિંક હોવાનો દાવો કર્યો, જેમની જમ્મુ-કાશ્મીરમાં હિંસા ભડકાવવામાં નકારી ન શકાય તેવી ભૂમિકા છે. આ મામલો સામે આવવા પર સિને એન્ડ ટીવી આર્ટિસ્ટ અસોસિએશન (CINTAA)એ તપાસની માગ કરી.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial
ઓડિશાથી લોકસભા સાંસદ રહી ચૂકેલા પાંડાએ જોકે પોતાની ટ્વીટમાં કોઈનું નામ નથી લીધું. તેમણે ટ્વીટ કરી કે, ‘કેટલીક બોલિવુડ પર્સનાલિટીઝના જમ્મુ-કાશ્મીરમાં હિંસા ભડકાવનારા પાકિસ્તાનીઓ અને એનઆરઆઈઓ સાથે વ્યક્તિગત અને વ્યાવસાયિક સંબંધોને ઉજાગર કરતી ચોંકવનારી હકીકતો જોઈ, જેમનો આઈએસઆઈ અને પાકિસ્તાની સેના સાથે સંબંધ છે. આ સંબધોની સરળતાથી પુષ્ટિ કરી શકાય છે.’ તેમણે પોતાની ટ્વીટમાં ‘બોલિવુડના દેશભક્ત લોકો’ને આવા લોકોથી દૂર રહેવા અપીલ કરી. ભાજપના નેતાએ લખ્યું કે, ‘હું બોલિવુડ સાથે જોડાયેલા દેશભક્તોને આગ્રહ કરું છું કે તે આવા લોકોનો બહિષ્કાર કરે.’
પાંડાએ જેવી આ ટ્વીટ કરી કે ઈન્ટરનેટ પર લોકોએ તાત્કાલિક પ્રતિક્રિયા આપવાની શરૂ કરી દીધી. કેટલાક લોકોએ પાંડને બોલિવુડના એ સ્ટાર્સના નામનો ખુલાસો કરવા અને તેમની સાથે સંલગ્ન સત્ય સામે લાવવાની અપીલ કરી, તો કોઈએ એનઆઈએ દ્વારા તપાસ કરાવવાનું સૂચન આપ્યું. તો, સિને એન્ડ ટીવી આર્ટિસ્ટ એસોસિએશને કહ્યું કે, ભારતની સુરક્ષાથી વધારે કોઈ અન્ય બાબત ન હોઈ શકે, એટલે આ મામલે ગંભીરતાથી તપાસ થવી જોઈએ.
ઉલ્લેખનીય છે કે, એક્ટર સુશાંત સિંહના નિધન બાદ બોલિવુડ ઘણા જૂથમાં વહેંચાઈ ગયું છે. એક જૂથ બીજા પર ભેદભાવ, ભાઈ-ભત્રીજાવાદનો આરોપ લગાવી રહ્યું છે, તો બીજું જૂથ આ આરોપોથી બચાવની મુદ્રામાં છે. સુશાંતે ગત 14 જૂને મુંબઈના બાંદ્રા સ્થિત પોતાના ઘરમાં આત્મહત્યા કરી લીધી હતી.