સંસદના મોનસૂન સત્ર પહેલા સોનિયા ગાંધી વિદેશ રવાના, રાહુલ પણ ગયા સાથે

નવી દિલ્હીઃ કોંગ્રેસ અધ્યક્ષ સોનિયા ગાંધી રૂટિન હેલ્થ ચેકઅપ માટે અમેરિકા રવાના થયા છે. તેમની સાથે તેમના પુત્ર અને વાયનાડનથી સાંસદ રાહુલ ગાંધી પણ ગયા છે. કોંગ્રેસ પ્રવક્તા રણદીપ સિંહ સુરજેવાલાએ ટ્વિટ કરીને તેની જાણકારી આપી છે. 73 વર્ષીય સોનિયા ગાંધી બે સપ્તાહ સુધી વિદેશમાં રહે તેવી શક્યતા છે. તેવામાં તેઓ સંસદના અડધા મોનસૂન સત્રમાં હાજર રહી શકશે નહીં.

સુરજેવાલાએ કહ્યું છે કે તેમની મેડિકલ ચેકઅપની તારીખ પહેલાથી જ નક્કી હતી પરંતુ કોવિડ-19ના કારણે તેમાં વિલંબ થઈ રહ્યો હતો. સોનિયા ગાંધી સપ્ટેમ્બરના અંતિમ સપ્તાહમાં સ્વદેશ પરત ફરી શકે છે. અમેરિકા જતા પહેલા સોનિયા ગાંધીએ શુક્રવારે કોંગ્રેસ સંગઠનમાં મોટો ફેરફાર કર્યો હતો. સોનિયા ગાંધી રૂટિન ચેકઅપ માટે 30 ઓગસ્ટે દિલ્હીની સર ગંગારામ હોસ્પિટલમાં ભરતી થયા હતા. તેમને 2 સપ્ટેમ્બરે હોસ્પિટલમાંથી રજા આપવામાં આવી હતી.
નોંધનીય છે કે સંસદનું મોનસૂન સત્ર આગામી સપ્તાહથી શરૂ થવા જઈ રહ્યું છે. લોકસભા અધ્યક્ષે 14 સપ્ટેમ્બરથી શરૂ થવા જઈ રહેલા સંસદ સત્રને કોવિડ-19 રોગચાળાના કારણે ઐતિહાસિક ગણાવ્યું છે. આ વખતે મોનસૂન સત્ર 18 દિવસનું હશે અને 1 ઓક્ટોબરે સમાપ્ત થશે.