મહારાષ્ટ્ર પોલીસને એક મહિલાને મોડી સાંજે પોલીસ સ્ટેશનમાં બોલાવીને પૂછપરછ કરવાનું ભારે પડ્યું

અમરાવતી, મહારાષ્ટ્ર: મહારાષ્ટ્ર પોલીસને એક મહિલાને મોડી સાંજે પોલીસ સ્ટેશનમાં બોલાવીને પૂછપરછ કરવાનું ભારે પડ્યું છે. આ બાબતે સ્ટેટ હ્યુમન રાઈટ કમિશનમાં પીડિતા દ્વારા ફરિયાદ દાખલ કરવામાં આવી હતી. જેના પર નિર્ણય સંભળાવતા આયોગે પોલીસ વિભાગ પર રૂપિયા 1 લાખનો દંડ લગાવ્યો છે. સુપ્રીમ કોર્ટની ગાઈડલાઈન મુજબ કોઈપણ મહિલાને સૂર્યાસ્ત બાદ પોલીસ સ્ટેશન બોલાવી શકાય નહીં.

10 વર્ષ જૂનો છે કેસ

લગભગ 10 વર્ષ પહેલા 21 માર્ચ 2011માં થયેલા એક કેસમાં પીડિતાને તેના પતિની ધરપકડ બાદ અમરાવતી પોલીસે તેને અને તેની બે દીકરીઓને પોલીસ સ્ટેશન બોલાવી હતી. પોલીસે તેઓને મોડી રાત સુધી રોકી રાખ્યા હતા અને તેઓને ધમકાવ્યા પણ હતા.

હ્યુમન રાઈટ કમિશને લગાવ્યો દંડ

પીડિતાએ આ મામલે મહારાષ્ટ્ર હ્મુમન રાઈટ કમિશનમાં તે પોલીસ સ્ટેશનના પોલીસ ઈન્સ્પેક્ટર વિરુદ્ધ ફરિયાદ દાખલ કરાવી હતી. આ ફરિયાદ પર કાર્યવાહી કરતા આયોગે રૂપિયા 1 લાખના દંડનો આદેશ આપ્યો છે.

હ્યુમન રાઈટ કમિશનના આદેશ બાદ પીડિતાએ કહ્યું કે આખરે 11 વર્ષની રાહ જોયા પછી તેને ન્યાય મળ્યો છે. તેણે કહ્યું કે તે પોતાના પતિ વિશે પોલીસ સાથે સહયોગ આપવા માટે તૈયાર હતી. પણ તેઓ મને પોલીસ સ્ટેશનમાંથી જવા દેતા નહોતા. હું મોડી રાત સુધી મારી દીકરીઓની સાથે પોલીસ સ્ટેશનમાં રાહ જોતી રહી. તેમણે આ પ્રકારના વર્તન પર સવાલ કરતા પૂછ્યું કે શું આ ઠીક છે? પીડિતાને પોલીસ કમિશ્નરેટ અમરાવતી તરફથી રૂપિયા 1 લાખનો ચેક આપવામાં આવ્યો છે.