કોલેજ-યુનિ.ઓની ફાઈનલ યરની પરીક્ષા થશે કે નહીં? સુપ્રીમે આપ્યો મહત્વનો ચુકાદો

નવી દિલ્હી: કોરોનાને કારણે દેશની અનેક કોલેજો અને યુનિ.ઓની પરીક્ષાઓ અટવાઈ ગઈ છે. તેવામાં સુપ્રીમ કોર્ટે આ અંગે એક મહત્વનો ચુકાદો આપતા કહ્યું છે કે કોઈપણ રાજ્ય ફાઈનલ યરના વિદ્યાર્થીને પરીક્ષા લીધા વિના પ્રમોટ કરી શકે નહીં. આ પરીક્ષા લેવી જ પડશે તેમ જણાવતા કોર્ટે રાજ્યોને આંશિક રાહત આપતા ડિઝાસ્ટર મેનેજમેન્ટ એક્ટ હેઠળ તેઓ ઈચ્છે તો પરીક્ષા પાછી ઠેલવા છૂટ આપી છે.

સુપ્રીમ કોર્ટે પોતાના ચુકાદામાં જણાવ્યું છે કે રાજ્યો યુજીસી સાથે ચર્ચા કરીને ફાઈનલ યરની પરીક્ષાની તારીખો નક્કી કરી શકે છે. તેનો મતલબ એમ થયો કે યુજીસીએ જે 30 સપ્ટેમ્બરની ડેડલાઈન મૂકી છે, તે રાજ્યો માટે ફરજિયાત નથી. તેઓ ઈચ્છે તો 30 સપ્ટેમ્બર બાદ પણ ફાઈનલ યરની પરીક્ષા લઈ શકે છે. જો કે પરીક્ષા લેવી ફરજિયાત છે.

યુજીસી દ્વારા ફાઈનલ યરની પરીક્ષા લેવી ફરજિયાત હોવા અંગે બહાર પડાયેલી ગાઈડલાઈનને સાચી ગણાવતા સુપ્રીમે જણાવ્યું હતું કે પરીક્ષા વિના વિદ્યાર્થીઓને પ્રમોટ ના કરવાનો યુજીસીનો નિર્ણય પણ સાચો છે. કોર્ટે જણાવ્યું હતું કે રાજ્યો પાસે ડિઝાસ્ટર મેનેજમેન્ટ એક્ટ હેઠળ રોગચાળાની સ્થિતિને ધ્યાનમાં રાખી પરીક્ષાની તારીખ નક્કી કરવાનો અધિકાર છે. જો રાજ્યો 30 સપ્ટેમ્બર બાદ પરીક્ષા લેવા ઈચ્છતા હોય તો તેમણે યુજીસી સાથે ચર્ચા કરવી પડશે તેમ પણ સુપ્રીમે સ્પષ્ટ કર્યું હતું.

ઉલ્લેખનીય છે કે, ગુજરાત જેવા રાજ્યમાં ગુજરાત યુનિ.એ ઓનલાઈન અને ઓફલાઈન પરીક્ષા લેવાનું આયોજન કરી દીધું છે. રાજ્યમાં હાલમાં જ ગુજકેટની પરીક્ષા પણ લેવાઈ ચૂકી છે, જેમાં મોટી સંખ્યામાં વિદ્યાર્થીઓ હાજર રહ્યા હતા. સપ્ટેમ્બર મહિનામાં ગુજરાત યુનિ. પરીક્ષા લેવાની છે તે ફાઈનલ છે. જો કે કેટલાક બિનભાજપ શાસિત રાજ્યો પરીક્ષા લેવાનો વિરોધ કરી રહ્યા છે. આ રાજ્યોએ સુપ્રીમ કોર્ટમાં પણ પિટિશન કરી હતી.