ઇનોવેશન માટે વિદ્યાર્થીઓ સવાલ અને વિરોધ કરે તે જરૂરી: પ્રકાશ જાવડેકર

નવી દિલ્હીઃ તાજેતરમાં જ માનવ સંસાધન વિકાસ પ્રધાન બનેલા પ્રકાશ જાવડેકરે ગુરુવારે કહ્યું હતું કે, ભારતમાં શિક્ષણ ક્ષેત્રે ઇનોવેશનની જ કમી છે, કારણ કે સ્કૂલ્સમાં વિદ્યાર્થીઓને સવાલ પૂછવા માટે હતોત્સાહિત કરી દેવાય છે. તેમણે કહ્યું હતું કે, આવી સ્થિતિ ન રહેવી જોઈએ. જ્યાં સુધી વિદ્યાર્થીઓ સવાલ નહિ કરે, યથાસ્થિતિને પડકારશે નહિ, ત્યાં સુધી તમે કોઈ પણ વસ્તુમાં ઇનોવેશન કેવી રીતે લાવી શકશો?

આ દરમિયાન, જાવડેકરે ગુરુવારે જ્યારે ઔપચારિક રીતે નવા મંત્રાલયનો કાર્યભાર સંભાળ્યો ત્યારે આ મંત્રાલયનાં ભૂતપૂર્વ પ્રધાન સ્મૃતિ ઈરાની નહોતાં આવ્યાં. એક સૂત્રના જણાવ્યાનુસાર, સ્મૃતિ ઈરાનીને બે વાર ફોન કરવામાં આવ્યા હતા, પરંતુ તેઓ આવ્યાં નહોતાં. જ્યારે જાવડેકરે કહ્યું હતું કે, તેમણે સ્મૃતિ ઈરાની સાથે સવારે વાત કરી હતી અને કોઈ જગ્યાએ વ્યસ્ત હોવાને કારણે તેઓ આવી શક્યાં નહોતાં.

શિક્ષણમાં ઇનોવેશન અંગે મોદી સરકારના વિચારોનો ઉલ્લેખ કરતાં માનવ સંસાધન વિકાસ પ્રધાને કહ્યું હતું કે, ઇનોવેશન મુખ્ય રીતે પ્રતિકાર કરવાની પ્રક્રિયા છે. જ્યાં સુધી તમે વિરોધી નહિ બનો, યથાસ્થિતિને પડકારશો નહિ ત્યાં સુધી તમે કોઈ વસ્તુમાં ઇનોવેશન કેવી રીતે લાવી શકશો? તેમણે સવાલ કર્યો હતો કે, ભારતમાં ઇનોવેશનનો અભાવ કેમ છે? આવું એટલા માટે છે, કારણ કે વિદ્યાર્થીઓને સવાલ કરવા દેવાતા નથી. આપણે જિજ્ઞાસાને પ્રોત્સાહિત કરતા નથી. જો સ્કૂલમાં કોઈ વિદ્યાર્થી સવાલ પૂછે તો તેને બેસાડી દેવાય છે. આ સ્થિતિ ન રહેવી જોઈએ. આપણે વિદ્યાર્થીઓની જિજ્ઞાસાને પ્રોત્સાહિત કરવી જોઈએ. તેઓ આનંદ બજાર પત્રિકા તરફથી આયોજિત કાર્યક્રમ ‘ઇન્ફોકોમ 2016’માં બોલી રહ્યા હતા. તેમણે કહ્યું હતું કે, વડાપ્રધાનનો મંત્ર સતત વિકાસનો છે, જે પ્રકૃતિને નુકસાન પહોંચાડતું નથી, પરંતુ તમામનો વિકાસ સુનિશ્ચિત કરે છે, જે માટે ઇનોવેશન મહત્ત્વનું છે.