આ કારણે બાળકોને કોરોના લાગુ પડવાનો ખતરો વયસ્કોની સરખામણીમાં ઘણો ઓછો

નવી દિલ્હીઃ શા માટે બાળકો જલદી કોરોના સાર્સ જેવી મહામારીની ચપેટમાં નથી આવતા? તાજેતરમાં થયેલા એક અભ્યાસમાં જાણવા મળ્યું છે કે બાળકોમાં વયસ્ક જેટલો ખતરો નથી રહેતો, તેમનામાં રહેલી એન્ટીબોડી કોરોના-સાર્સ જેવી મહામારી સામે લડવામાં મદદરુપ બને છે. આજ વિષય પર કરવામાં આવેલા એક રિસર્ચમાં મહત્વની બાબત સામે આવી છે.

લંડનની ફ્રાન્સીસ ક્રિક ઈન્સ્ટિટ્યુટમાં એક ગ્રુપ દ્વારા બાળકોને કોરોના કેમ લાગુ નથી પડતો તે વિષય પર રિસર્ચ કરવામાં આવ્યું છે. આ રિસર્ચને જ્યોર્જ કાસિઓટિસ દ્વારા લીડ કરવામાં આવ્યું હતું, જેઓ ઈન્સ્ટિટ્યુટની રિટ્રોવલ ઈમ્યુનોલોજી લેબોરેટ્રીના અધ્યક્ષ છે. રિસર્ચમાં જાણવા મળ્યું કે બાળકોમાં જે એન્ટી બોડી હોય છે તે વયસ્ક 5% વ્યક્તિઓમાં જ હોય છે. જ્યારે બાળકોમાં તેનું પ્રમાણ 43% હોય છે.

5માંથી 1 બાળકને જ્યારે ઘરની કોઈ વ્યક્તિને શરદી થઈ હોય ત્યારે ઈન્ફેક્શન લાગે છે. વયસ્ક વ્યક્તિથી બાળકને શરદી થાય ત્યારે તેનામાં એન્ટીબોડી વિકસિત થાય છે, જે સાર્સ-કોરોના સામે લડી શકે છે. આ મહામારી પહેલા 300 વયસ્ક અને 48 બાળકોના લોહીના સેમ્પલ લેવામાં આવ્યા હતા, જેને 170 લોકો કે જેમને કોરોના થઈ ગયો છે તેની સાથે સરખામણી કરવામાં આવી હતી. જેમાં જોવા મળ્યું કે ઘણાં બાળકો અને વયસ્કોમાં એ પ્રકારની એન્ટીબોડી જોવા મળી જે કોરોના સામે લડી શકે છે.

હવે આ રિસર્ચ બાદ તેના ઊંડાણમાં જઈને કેટલીક તપાસ કરવામાં આવી રહી છે. કોરોના શરુ થયો ત્યારથી અત્યાર સુધીમાં વિવિધ પ્રકારના રિસર્ચ કરવામાં આવ્યા છે. જેમાં હાલની બાળકોના એન્ટીબોડી પર થયેલા રિસર્ચમાં જાણવા મળે છે કે કોરોના વયસ્કો કરતા બાળકોને જલદી અસર નથી કરતો. જો બાળકોને કોરોનાનું ઈન્ફેક્શન લાગ્યું હોય તો પણ તે વયસ્કોની સરખામણીમાં ઓછો ઘાતક સાબિત થાય છે. ઘણાં કેસમાં એવું જોવા મળ્યું કે બાળકોને કોરોના લાગુ પડ્યો હોય છતાં લક્ષણો એકદમ નબળા હોય છે.