ગુજરાતમાંથી પણ સરકારી બેંકના કર્મચારીઓ ભારત બંધમાં જોડાયા છે. અમદાવાદ, સુરત સહિના શહેરોમાં આજે બેંકના કર્મચારીઓએ રેલી કાઢી હતી, તેમજ પોતાની માગોને પૂરી કરવાને લઈને સૂત્રોચ્ચારો પણ કર્યા હતા. ઉલ્લેખનીય છે કે, રાજ્યમાં બેંકોમાં આગામી બે દિવસ સુધી કામકાજ ઠપ્પ રહેવાનું હોવાથી 25 હજાર કરોડ રુપિયાના વ્યવહારો અટવાઈ પડે તેવી શક્યતા છે.
કેટલાક રાજ્યોમાં ભારતની જોરદાર અસર જોવા મળી રહી છે. કેરળમાં તેના કારણે બસ સેવા પણ ખોરવાઈ ગઈ છે. પશ્ચિમ બંગાળમાં કેટલીક જગ્યાએ ટ્રેનો અટકાવવા માટે પણ પ્રયાસ કરવામાં આવ્યો હતો. આ બંધમાં રેલવે, ડીફેન્સ સેક્ટર, બેંક, વીમો, ટેલીકોમ, સ્ટીલ, ઓઈલ, કોલસો, પોસ્ટ, ઈન્કમટેક્સ જેવા ક્ષેત્રો સાથે સંકળાયેલી સરકારી કંપનીઓના કર્મચારીઓ ભાગ લઈ રહ્યા છે. આજના જ દિવસે ગોવાના સીએમ પદે પ્રમોદ સાવંત શપથ ગ્રહણ કરી રહ્યા છે, ત્યારે ભારત બંધને પગલે તેમાં કોઈ વિક્ષેપ ઉભો ના થાય તે સુનિશ્ચિત કરવા સુરક્ષા વ્યવસ્થા વધુ કડક બનાવાઈ છે.
ઓલ ઈન્ડિયા બેંક એમ્પલોઈઝ એસોસિએશને કહ્યું અમે હડતાળની આ જાહેરાતને સમર્થન આપવાનો નિર્ણય લીધો છે. અમે આ હડતાળમાં બેંકિંગ ક્ષેત્રોની માગો પર ધ્યાન અપાવવા માટે સામેલ થઈ રહ્યા છીએ. બેંક યુનિયનની માગ છે કે સરકાર સાર્વજનિક ક્ષેત્રોની બેંકોનું ખાનગીકરણ બંધ કરે અને તેને મજબૂત કરે. આ સિવાય અમારી માગ છે કે ડૂબી ગયેલા પૈસાની વસૂલી ઝડપી કરવામાં આવે, બેંક જમા પર વ્યાજ વધારવામાં આવે, સેવા ચાર્જમાં ઘટાડો કરવામાં આવે અને જૂની પેન્શન યોજના ફરી શરૂ કરવામાં આવે.
સાર્વજનિક ક્ષેત્રની ભારતીય સ્ટેટ બેંકે જણાવ્યું કે હડતાળના કારણે તેઓની સેવાઓ પર થોડી ઘણી અસર પડી શકે છે. એસબીઆઈએ કહ્યું કે પોતાની તમામ શાખાઓ અને કાર્યાલયોમાં સામાન્ય કાર્યને સુનિશ્ચિત કરવા જરૂરી વ્યવસ્થા કરવામાં આવી છે. પંજાબ નેશનલ બેંકે કહ્યું કે એઆઈબીઈએ, બેંક એમ્પલોઈઝ ફેડરેશન ઓફ ઈન્ડિયા તથા ઓલ ઈન્ડિયા બેંક ઓફિસર્સ એસોસિએશને 28 અને 29 માર્ચે હડતાળની નોટિસ આપી છે. બેંગ્લુરુ મુખ્યાલયવાળી કેનરા બેંકે કહ્યું કે હડતાળના કારણે સામાન્ય બેંકિંગ કાર્ય પર અસર થઈ શકે છે. કેન્દ્રિય ટ્રેડ યૂનિયનોના એક ફોરમે 28 અને 29 માર્ચે ભારત બંધની જાહેરાત કરી છે.