બેડથી બારી સુધી પહોંચ્યું, 12મા માળેથી નીચે પડતાં દોઢ વર્ષના બાળકનું મોત

ચેન્નઈઃ ચેન્નઈ વલ્લાજા રોડસ્થિત એક એપાર્ટમેન્ટના 12મા માળે આવેલા ફ્લેટમાં બાળક એકલું બેડ પર સૂતું હતું. થોડી વારમાં તે બારી સુધી પહોંચ્યું અને નીચે પડી ગયું. દોઢ વર્ષનો મોહમ્મદ ફાથુસ જ્યારે ઊંઘમાંથી જાગ્યો ત્યારે તેની માતા અજિરા રસોડામાં હતી. જ્યારે તેના પતિ યાકુબ બીજા રૂમમાં હતા. અજિરા સવારે લગભગ સાડા નવ વાગ્યે જ્યારે બેડરૂમમાં ગઈ તો ફાથુસ ત્યાં નહોતો. તેણે જોયું કે ગ્રીલવાળી બારી ખુલ્લી હતી. ગભરાઈ ગયેલી અજિરા પતિ પાસે ગઈ અને એ જ સમયે સિક્યોરિટી ગાર્ડ દોડતો તેમના ઘરે આવ્યો. આ ગાર્ડે બાળકને નીચે પડતાં જોયું હતું. ફાસુથને હોસ્પિટલ લઈ જવાયો હતો, પરંતુ ડોક્ટરે તેને મૃત જાહેર કર્યો હતો.

પોલીસના જણાવ્યાનુસાર, બાળકનાં માતાપિતા મોટે ભાગે બારી બંધ રાખતાં હતાં, પરંતુ મંગળવારે સવારે એસી ચાલતું ન હોવાથી બારી ખુલ્લી રહી ગઈ હતી. દંપતીને એક પુત્રી પણ છે, તેમણે પોલીસ ફરિયાદ નોંધાવી નથી, પરંતુ પોલીસે અકસ્માત મોતનો ગુનો નોંધ્યો છે.