કિન્નરોની મદદથી ટ્રેનમાં થયો બાળકનો જન્મ

વેલ્લોરઃ સામાન્ય રીતે કિન્નરોથી લોકો ડરે છે. રસ્તા અને ટ્રેનમાં મુસાફરોને ડરાવી ધમકાવીને પૈસા વસૂલતા હોવાની તેમની છબિ બની ગઈ છે, પરંતુ આ ધારણા વચ્ચે બુધવારે સવારે તિરુવનંતપુરમ્-ગુવાહાટી એક્સપ્રેસમાં એક 25 વર્ષની મહિલાને ટ્રેનમાં પ્રસૂતિ પીડા થતા ત્રણ કિન્નરોએ તેની મદદ કરી. ત્રણેય કિન્નર માલતી (26), સાંકરી (51) અને શ્યામલા (50) જોલરપટ્ટેથી કાટપાડી જઈ રહ્યાં હતાં. વહેલી સવારે વાણિયંબાડી પાસેથી ટ્રેન પસાર થઈ રહી હતી ત્યારે જરીના બેગમને પ્રસૂતિ પીડા થઈ હતી, જેથી આસપાસના મુસાફરો ગભરાઈ ગયા હતા. કેટલાક લોકોએ ચેઇન ખેંચી ટ્રેન રોકવાની સલાહ આપી, પણ ટ્રેન રોકવી મુશ્કેલ હતી.

માલતી કહે છે કે, ટ્રેન જે રસ્તેથી પસાર થઈ રહી હતી તે જંગલ વિસ્તાર હતો અને આસપાસ કોઈ પણ મદદ મળી શકે તેમ નહોતું. તેથી ટ્રેન રોકવામાં આવી નહોતી. માલતીએ તેની સાથેનાં કિન્નરોની મદદથી મહિલાની ડિલિવરી કરાવી. જરીના બેગમ તેના પતિ અને બે બાળકો સાથે મુસાફરી કરી રહી હતી. આ દરમિયાન ટ્રેનમાં મુસાફરી કરી રહેલા અન્ય મુસાફરોએ રેલવે પોલીસને ફોન કરી આ વિશે જાણકારી આપી અને આગળના સ્ટેશને એમ્બુલન્સ તૈયાર રાખવા જણાવ્યું. સવારે આઠ વાગ્યે કાટપાડી સ્ટેશન પહોંચતાં માતા અને નવજાતને એમ્બુલન્સથી વેલ્લોર મેડિકલ કોલેજ લઈ જવાયાં.

માલતી વધુમાં જણાવે છે કે, તેમણે 2009માં મેડિકલ લેબોરેટરી ટેક્નોલોજીમાં ડિપ્લોમા કર્યું હતું અને એક સરકારી હોસ્પિટલમાં છ મહિનાની ટ્રેનિંગ પણ કરી હતી, પરંતુ પારિવારિક કારણોથી તેણે ટ્રેનિંગ અધવચ્ચેથી છોડી દીધી હતી.